भांगरभूंय | प्रतिनिधी
आमची पयलीं सावन एक पद्दत आसा. जांचें पोट भरलां तांकांच जेवणाचें आमंत्रण दिवप. उपाशी आशिल्ल्यांक कोण विचारीच ना. पयलीं सावन अशेंच घडत आयलां. आमचें सरकारूय तशेंच. आमचेंच सरकार तें, आमीच वेंचून हाडलां म्हणटकूच आमचे वरीच वागतलें. आतां अशें म्हणलें म्हूण कोणाकूय नाकसुरें वचूं येता. आमच्या सरकाराक अशें म्हणटा? सरकार तर नवनिर्मणेची तयारी करता. आमी ताका तेंको दिवंक जाय बी म्हणपाचे डोस दितूय बी. पूण हें नवनिर्माण अजून तरी आमच्या गळ्या सकयल वचूंक ना. आसूं. तर पयरूच बजेट जालें आनी बजेटान दिल्ली जिखली. राजधानी जिखतकूच बाकी देश जिखूंक कितलो वोगोत लागतलो? तातूंत बारा लाखां मेरेन जोडीचेर कर ना. धंयार धुमको म्हणटात तशें जालें. प्रत्यक्षांत कितें जातलें तें कळूंक वर्स वचूंक जाय. सद्याक तरी सगले खुशाल.
तसो एक प्रस्न पडटाच, तो म्हणल्यार बारा लाख जोडप कशे? ते खातीर एक तर सरकारी वा खंयचेंय पब्लीक सॅक्टर कंपनींत बऱ्या हुद्द्याची नोकरी मेळोवप. आतां ही नोकरी मेळोवंक लागपी लाख खंयच्यान हाडप होवूय प्रस्नन आसाच. खंयच्याय प्रायव्हेट कंपनींत काम करून वर्साक बारा लाख मेळोवप हें गोंयांत तरी सामकेंच अशक्य काम. आतां तर केंद्र सरकारान आठव्या आयोगाची घोशणा केल्या. केंद्रान एकदां आठव्या आयोगाचे सुचोवणे वेल्यान पगार थारायलो म्हणजे आयज वा फाल्यां दर एक राज्य आपल्या कर्मचाऱ्यांक रडत मरत जायना तोच पगार लागू करतलें. तसो अजून जायते जाणांक सातवो आयोगूच लागू जावंक ना. हालींच पणजे कदंबा कर्मचाऱ्यांनी हरताळ केलो. तांकां जरी सातवो आयोग लागू केला तरी अजून तांकां मेळूंक जाय आशिल्ली थकबाजी मेळूंक ना. आनिकूय जायतीं म्हामंडळां आसात जांकां सातव्या आयोगाचे लाव मेळूंक नात. गोंय उद्देगीक म्हामंडळान तर दोन हजार अठरांतल्यान सातव्या आयोगाचो लाव कर्मचाऱ्यांक दिला. म्हणजेच दोन हजार सोळा ते दोन हजार अठरा ह्या दोन वर्सांत जे कामाक आसले तांकां वाऱ्यार उडयल्यात. ह्या दोन वर्सांत रिटायर जाल्ल्यांक सव्या आयोगाचेरूच समाधान मानचें पडलां. पयरूच ह्या म्हामंडळाक फायद्यान आयिल्ले खातीर इनाम फावो जालां. कांय कर्मचाऱ्यांक उणो पगार दिल्ल्यान म्हामंडळ फायद्यांत आयलें काय? जाल्यार सरकारान आपल्या सगल्याच कर्मचाऱ्यांचो पगार उणो केल्यार बरो काय दिसता. सरकार फायद्यांत येतलें.
आतां आठवो आयोग येता. देशाची लोकसंख्या एकशें बेचाळीस कोटींचेर पावल्या. पुराय देशांत नोकरी करपी लोक सुमार पंच्चावन ते साठ कोटी. हातूंत केंद्र सरकारचे कर्मचारी फक्त तीस लाख. आतां आठव्या आयोगाचो लाव ह्या तीस लाखांक मेळपाचो. हे भायर दर एका राज्याचे राज्य कर्मचारी, कॉर्पोरेशनाचे कर्मचारी आनी सेनादल हांकांय आयज वा फाल्यां हो लाव मेळटलो. एकूण संख्येचो विचार केलो जाल्यार ह्या कर्मचाऱ्यांची संख्या सव्वा ते देड कोटी जातली. कारण बँक वा हेर पब्लीक सॅक्टर युनिटांचो ह्या आयोगा कडेन संबंध येना. तांची पगारवाड वेगळे तरेन जाता. बँकांक तर पगार वाडी खातीर कितले फावटी तरी संपाचें हत्यार भायर काडचें पडटा. आनी धा एक वर्सांनी तांची पांच वर्सांच्या कराराचेर सय जाता. पूण तो मेरेन संप करून कितलोसोच पगार तांणी व्हगडायिल्लो आसता.
म्हणटकूच ह्या आयोगाचो लाव सुमार देड कोटी कर्मचाऱ्यांक मेळटलो. साठ कोटी पगारदारांतल्या देड कोटींक हो लाव मेळपाचो. हेर अठ्ठावन कोटी पन्नास लाखांचो ह्या आयोगा कडेन कसलोच संबंध ना. सद्याक सरकारी कर्मचाऱ्यांक म्हयन्याक उणोच तीस हजार पगार मेळटा. अर्थांत हो सगल्यांत सकयल्या कर्मचार्याक. वरिश्ठांक पांच लाख मेरेन पगार मेळटा. ओगीच दर एकलो लाखांनी रुपया दिवन सरकारी नोकरे फाटल्यान धांवता तर? आठव्या आयोगा उपरांत होच पगार पंचेचाळीस हजार ते स लाख मेरेन पावतलो असो अदमास. ते भायर दर स म्हयन्यांनी म्हारगाय भत्तो वाडटलोच.
आतां मजा पळेयात, एके वटेन सरकार आपल्या कर्मचाऱ्यांचेर कितलें उदार जाता तें वयल्या पगारा वेल्यान दिसता. पूण दुसरे वटेन ह्याच सरकारचें काम करपी आंगणवाडी सेवक, भलायकी कर्मचारी, सर्व शिक्षा अभियान इतलेंच कित्याक काँट्रेक्टाचेर आशिल्ल्यांक कितें मेळटा? तर साडेचार ते धा हजार. काँट्रेक्टाचेर काम करपी लेक्चरर लेगीर चडांत चड चाळीस ते पन्नास हजारांच्या पगाराचेर समाधान मानतात. चडशे जाण लेक्चरां फाटल्यान धांवतना दिसतात. आयज हांगा तर फाल्यां थंय. आनी हांचो पगारूय केन्ना मेळटा तर तीन ते चार म्हयन्यांनी एकदां. आनी अश्या काम करपी लोकांची संख्या देशांत एक कोटी वयर आसा. ते भायर फॅक्टरींनी काम करपी ग्रेज्युयेट, इंजिनीयर, फार्मासिस्ट भुरगे जांकां म्हयन्याक आठ ते धा हजारांचेर जिवीत सारचें पडटा तांचो विचार करूंक कोणाक वेळ ना. दीसवाड्याचेर काम करतल्यांचो किमान दीसवडो अजून थारून थारना. फक्त बसका आनी पांच रुपया वाडोवप काय धा रुपया हाचेरूच विचार करप इतलेंच चल्लां. दर वर्साक एक मेक जमून तांणी घोशणा दिवपाच्यो आनी समाधान मानून घेवपाचें. शेतकारांक बाबड्यांक आधारभूत मोल मागपाक रस्त्यार ठाण मारचें पडटा. केन्ना बाबडे रस्ते आडायतात तर केन्ना लाठयो खातात. आनी सरकार आठवो वेतन आयोग हाडटा. कोणाक? जांचीं पोटां भरल्यांत तांची भूक भागोवंक. म्हणटात न्हय, कसतल्याक पेज आनी मेरेर बशिल्ल्याक शीत तांतलेंच हें.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
