कश्टी लोकूच जैवविवीधतायेचे राखणदार: डॉ. सरमोकादम

भांगरभूंय | प्रतिनिधी

पार्से जालें ‘जैवविवीधतायेचो सांबाळ’ विशयाचेर शिबीर

पेडणें: शेतकार, नुस्तेंमार, मेहनती अशे कश्टी लोक जैवविवीधतायेची राखण योग्य तरेन करपाक शकतात. हे लोकच खर्‍या अर्थान जैवविविधतेचे राखणदार आसा अशें गोवा जैवविवीधताय मंडळाचे वांगडी सचीव डॉ. प्रदीप सरमोकादम हांणी सांगलें.
गोंय जैवविवीधताय मंडळ आनी पार्से जैवविवीधताय समिती हांच्या जोड पालवान नव्या पार्से पंचायत सभाघरांत आयोजीत केल्ल्या ‘जैवविविधतेचो सांबाळ’ विशयावेल्या मार्गदर्शन शिबिरांत मखेल सोयरे म्हणून ते उलयताले. ह्या वेळार माचयेर गटविकास अधिकारी शुभम भरतू , मंडळाचे डॉ. सुहास गोडसे, पार्सेचे सरपंच तशेंच पार्सें जैवविवीधताय समितीचे अध्यक्ष अजय कळंगूटकार, उपसरपंच प्रद्न्या पार्सेकार, सचीव विजय तिळवे आनी हेर हजर आशिल्ले.
एका काळार गांवगिर्‍या वाठारांतले लोक जैवविवीधतायेची राखण करताले. देवराई ही पर्यावरण नियंत्रक म्हणून काम करताली. मात काळा प्रमाण हें सगलें शेणत वता. अश्या वेळार दरेकल्यान जैवविविधतायेची राखण करपाचें हें घेतिल्लें पावल मुखार व्हरपाक जाय. गांवां गांवांतली जैवविवीधताय सांबाळपाक जाय. जाल्यारूच आमची जीण सुरक्षीत उरतली, अशें सांगलें. आमची जिणे पद्धत बदल्ल्या. आमो भोगवादी जाल्यांत. अशा वेळार पर्यावरण संरक्षणा खातीर सगल्यांनी स्वता मदीं बदल घडोवन हाडचो, अशेंय तांणी सांगलें.
डॉ. सुहास गोडसे हांणी आयची पिळगी जैवविवीधते सावन पयस वता. सैमाची राखण करपाक तांकां जैवविविधतेच्या कार्यांत जोडून घेवपाक जाय अशें सांगलें. गट विकास अधिकारी शुभम भरतू, हांणी गांवांत वाडत वचपी कोयराचे समस्ये कडेन लक्ष ओडलें.
पार्सेचे सरपंच तशेंच जैवविवीधताय समितीचे अध्यक्ष अजय कळंगूटकार हांणी येवकार आनी प्रास्तावीक केलें. ह्या वेळार पार्से जैवविवीधताय समितीच्या लोगोचे मान्यवरांच्या हस्तुकीं उक्तावण जालें.
ऍड. दीप्ती सुरेश कांबळी हिणें सुत्रसंचालन केलें. सचीव विजय तिळवे हांणी उपकार मानले.
उक्तावण सत्रा उपरांत जाल्ले चर्चेंत डॉ. प्रदीप सरमोकादम, गटविकास अधिकारी शुभम भरतू, डॉ .सुहास गोडसे, वर्षा केरकार हांणी मार्गदर्शन केलें. हातूंत अजय कळंगूटकार (पार्से) विठोबा बगळी, अमोल रावत (आगरवाडो, चोपडें), महेश वायंगणकार (हरमल), अनुराधा कोरगांवकर, पंढरी आरोलकार (कोरगांव) धनंजय शेट शेटगांवकार (मोरजी), विश्वनाथ शिरोडकार (मांद्रें), उदय मांद्रेंकार (तुयें), अविनाश पाळणी (केरी) हांणी वांटो घेवन विवीध सुचवण्यो केल्यो.