भांगरभूंय | प्रतिनिधी
फार्म सात दिसां भितर बंद करीना जाल्यार पंचायतीचेर मोर्चो : थळावे
केपें: कश्टी – कालेच्या पिग फार्माक लागून हांगचो व्हाळ दुशीत जाल्ल्यान सगळे कडेन घाणयारें वातावरण पातळ्ळां. हें पिग फार्म दुसरे कडेन स्थलांतरीत करचें वा बंद करचें अशी मागणी थळाव्या लोकांनी केल्या. ना जाल्यार पंचायतीचेर मोर्चो व्हरतले अशी शिटकावणी लोकांनी केल्या.
कश्टी, काले थळाव्या लोकांक काळखांत दवरून पिग फार्म सुरु केलां. हांगा धुकर पोसल्यात. थंयचें घाणयारें उदक सोडिल्ल्यान मुखेल व्हाळांतलें उदक दुशीत जालां. देखून आयज थळाव्या लोकांनी खास बसका आपयिल्ली. ह्या वेळार थळावे सरपंच, पंच वांगड्यांकूय आपयिल्ले. भायल्या मनशान जनावरां पाळपा खातीर फार्म उबारिल्ल्याचें सांगून पिग फार्म उबारलां, अशें ह्या वेळार सरपंच बाळू गांवकार हांणी सांगलें.
पिग फार्मांत व्हडा प्रमाणांत दुकरांची पैदास केल्ल्यान कश्टी व्हाळाचे कुशीकूच घाणयारें उदक वचपा खातीर सोक पिट बांदलां. तातूंत उदक सोडटात. तें उदक व्हाळांत वता, अशें गांवकार हांणी सांगलें.
कष्टीचे हिंदू लोक व्हाळाच्या उदकांत धर्मीक विधी करतात. गणपती विसर्जन, सरस्वती विसर्जन तशें शिगमोत्सवांतल्यो विधी हातूंत आसा अशें थळावे अमर नायक हांणी सांगलें.
कश्टी सारक्या गांवांत धुकर पोसपाच्या फार्माक थळावे पंचायतीन खंयच्या आदाराचेर ना हरकत दाखलो दिला असो प्रस्न थळाव्यांनी हजर केलो. आमी ह्या फार्मा आड ना. मात संबंदीत धनयान तो थंयच्यान दुसरे सुवातेर स्थलांतरीत करचो वा बंद करचो अशी मागणी थळाव्यांनी केल्या.
गांवची पवित्रताय तिगोवन दवरपा खातीर आमी लढटले अशें लोकांनी सांगलें. थळावे पंचायतीन फार्मा खातीर दिल्लो ना हरकत दाखलो बेगीनूच फाटीं घेवन हें फार्म सात दिसां भितर बंद करचें अशी मागणी लोकांनी केली. ना जाल्या पंचायतीचेर मोर्चो व्हरतले अशी शिटकावणी लोकांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
