कश्टा सांगाताक नेटान वावरात

भांगरभूंय | प्रतिनिधी

भावंडांनो,
फाटल्या सप्तकांत धावेचे परिक्षेचो निकाल लागलो आनी तुमकां तुमी घेतिल्ल्या कश्टांचे गोड फळ चाखूंक मेळ्ळें. तुमकां सगळ्यांक म्हजी काळजांत सावन परबीं. तुमीं सदांच अशींच जैतान खोशी आनी धादोशी उरूं. तुमचेवरी तुमच्या घरांत खोशयेचें वातावरण नेमान फांकूं, हेंच आवंडेंता.
भावंडांनो, आदी सांगिल्ले प्रमाण परतून एकदां सांगतां, जीं भावंडां जैत जोडूंक अपेशी थारल्यांत ताणीं आपणालो धीर वगडावचो न्हय. दुसऱ्यांपरस उणाक वा खालच्या पावंड्याचीं, वेगळीं आसात अशें मानून घेवचें न्हय. तुमी परतून निर्धारान अभ्यास करात, मनन चिंतन करून अभ्यासाची गती वाडयात. याद दवरात, आयचें अपेस तुमचें मानसीक बळगें वाडयतलें आनी दुसरे खेपो निकालांत जैतिवंत जाल्लीं भुरगीं म्हण तुमीच आसतलीं.
भावंडांनो, सुटयेंतलो एक-एक दीस जिणेंतली नवी वाट , नवी उमेद, नवी इत्सा घेवन येता. तुमी भावंडां ते संदीचो लाव घेयत जैतिवंत जायत आसा. अशे तरेन सुटयेचो लाव घेवन पर्जळत रावात हीच म्हजी इत्सा.
भावंडांनो, तुमच्या अभ्यासा खातीर, म्हळ्यार गिन्यानाखातीर ह्या सप्तकांतल्यो म्हत्वाच्यो घडणुको तुमचे मुखार दवरतां. 19 मे दिसा आमचे आदले राष्ट्रपती निलम संजीव रेड्डी हांची जयंती. तेचपरी संत ज्ञानेश्वर माऊलींची मायेस्त भयण मुक्ताबाय हाणी एदलाबादेंत समाधी घेतिल्ल्याचो इतिहासीक दीस. तांच्या जिवितांतल्यान आमकां जायतो बोध मेळ्ळा. ह्याच दिसा इतिहासांत स्वतंत्रतायेच्या चळवळींत आपल्या जिविताची पर्वा करिनासतना वांटेकार जाल्ले नामनेचे फुडारी बिपीनचंद पाल हांकां मरण आयलें. तांचे देशभक्तीक लागून आमी हो दीस विसरूंक फावना. 20 मेक उत्तर भारतांतले संत कवी कबीरदास हांची जयंती. तांच्या दोह्यांतल्या आमच्या जिविताचें तत्वगिन्यान आमकां मेळटा, जिविता खातीर उजू मार्ग मेळटा.
21 मे दिसा , आदले प्रधानमंत्री राजीव गांधी हांकां पेरांबुदूर वाठारांत बॉम्बस्फोटांत मरण आयिल्ल्यान तांचे यादीक हो दीस देशभर यादींत दवरतात. होच दीस सतीची चाल कायद्यान बंद करपी नामनेचे व्हड समाज सुदारक राजा राममोहन रॉय हांची जयंती म्हूण पाळटात. ताणीं स्वतंत्रतायेच्या आनी समाज सुदारणेच्या वावरांत दिल्ल्या मोलादीक योगदानाचो विसर देशभावंडांक केन्नाच पडचो ना. 23 मे ह्या दिसा बंचेद्री पाल हे अस्तूरेन एवरेस्ट शिखराचेर पावल दवरून जाल्यार महात्मा गांधीजीनीं गुजरातेंत साबरमती आश्रम उबारून इतिहास रचला. तांची याद आमी दवरूंक जाय..
भावंडांनो, निमणे परतून एकदां सांगतां, अपेसान वायट विचार मनात हाडून घरच्यांक दुखेव नाकात. जो आपल्या ध्येयासावन पयस वता तो भित्रो. तुमी तर म्हजीं मोगाळ भावंडां. भित्री न्हय, देखून परतून एकदां यत्न आनी कश्टा सांगाताक नेटान वावरात आनी जैताक तुमचे मुठींत धरात. धरतलीं न्हय ? येयात तर

– उल्हासभाई