कश्टाचें फळ

भांगरभूंय | प्रतिनिधी

बदलापूर नांवाचो एक गांव आशिल्लो. त्या गांवांतल्या सगळ्या लोकां मदीं व्हड मोग आशिल्लो. संकश्टाच्या वेळार सगले एकामेकांक आदार करताले. पूण आळशीपणान मात सामके फुडें आशिल्ले. गांवच्या लोकांचो मुखेल वेवसाय शेती आशिल्लो. एकदां दुर्दैवान थंय दुकळ पडलो. पावसाच्या उणावाक लागून सगळीं पिकां नश्ट जालीं. न्हंयो सुकल्यो. उदकाक लागून हालहाल जाले. सगळे भुकेन मरपाक लागले. सांठयल्लें पुरुमेंत, भाजीपालो सगळो सोंपलो. फकत मनीस न्हय तर जनावरां आनी सुकणीं लेगीत, सगळ्यांकूच त्रास सोसचे पडले. लोकांक उदक पिवपाचीय तळमळ जावंक लागली. अशे परिस्थितींत मुखेल्यान गांवच्या लोकांकडेन कितें करचें हाचेर उपाय काडपाक सांगलें, पूण कोणाकूच योग्य उपाय काडपाक जमलेंना.
राजन नांवाच्या शेतकारान पिवपाच्या उदकाचो प्रस्न सुटावो जावचो म्हूण बांय खणपाचो सल्लो दिलो. ताका कोणाचीच मान्यताय मेळ्ळी ना. सगळ्यांक हें एक सामकें कश्टाचें काम अशें दिसतालें. सगळ्यांनी एकठांय काम केल्यार बांय खऱ्या अर्थान खणूं येता असो राजनाक पुराय विस्वास आशिल्लो. पूण, ताका आदार दिवपाक कोणूच तयार नाशिल्लो. पूण राजनाचो हावेस उणो जालो ना आनी ताचो इश्ट परेशान ताका तेंको दिवपाचें थारायलें. दोगूय इश्ट कुदळ घेवन गांवच्या देवळांत पावले. ताणें देवा कडेन मागणें केलें आनी थंयच देवळाचे देगेर बांय खणपाचें थारायलें. ताणें ह्या कामाची सुरवात काळजांत देवाचेर आशिल्लो विस्वास दवरून केली.
दोगांयनी खूप कश्ट घेतले . रातीचो दीस केलो, फकत कश्ट करीत रावले. खूब थकले तेन्ना थोडो विसव घेताले आनी मागीर परतून कामाक लागताले. गांवच्या लोकांनी तांकां पिश्यान काडले, पूण दोगूय इश्ट कश्टान बांय खणत रावले. सुर्याची खर उश्णताय लेगीत तांकां तांच्या निर्धारांतल्यान आडावंक शकली ना. ताच्या आंगांतल्यान घाम भरपूर व्हांवपाक लागलो, हातांत फोड दिसूंक लागले, पूण ते आपल्या हावेसाचेर घट्ट उरले आनी निमाणें फावटी कुदळ मारता म्हणसर उदकाचो व्हाळ भायर सरलो. तांच्या दोळ्यांतल्यान दुकां व्हांवपाक लागलीं आनी सुखाक लागून तांचो गळो घट्ट जालो. तांणी देवाचे भरपूर उपकार मानले. तांचे यत्न फळाक आयले. तांच्या खोशेक शीम मेर नासली.
गांवच्या लोकांच्या अजापाक मर्यादा नाशिल्ली. हें अप्रूप घडलें तरी कशें हें येवजीत कांय जाण दांत पांजयत उरले. काल मेरेन तांची फकाणां करपी लोकांनी लजेन तकली सकयल घाली. उलोवपी फकत उलयत उरले आनी करणारे करून गेले तश्यांतली ही खबर. ध्येयाचेर खर विस्वास दवरून कश्ट आनी समर्पण केल्यार अशक्य लेगीत शक्य जावंक शकता हें दोगांयनी गांवच्या लोकांक दाखोवन दिलें. कश्टाचें फळ गोड आसता हें म्हणटात तें फट न्हय.

शिल्पा लाड
8411007204