भांगरभूंय | प्रतिनिधी
पणजीः नामनेचे कवी, साहित्यीक संजीव (संजू) वेरेंकार (64) काल रातीं साडेआठांक ल्हान तेंपाच्या दुयेंसान संवसाराक अंतरले. तांचेर बांबोळेच्या गोंय वैजकी म्हाविद्यालयांत उपचार चलताले. तांचे फाटल्यान घरकान्न आनी दोन चलयो असो परिवार आसा. तांच्या मरणाचेर गोंय, कारवार, मंगळुरुच्या साहित्यीक, संस्थांनी दुख्ख उक्तायलां. पत्रकारांची संघटना गूजानूय तांकां आर्गां ओंपल्यांत. तांचे निमाणे संस्कार केन्ना जातले, तें रातीं उसरां मेरेन कळूंक नासलें.
संजीव हांचो जल्म 29 आॅगस्ट 1959 दिसा जालो. सुनापरान्तांत तांणी 1987 सावन काम केलें. उपरांत तांणी नवप्रभांत पणजी प्रतिनिधी म्हूण काम केलें. कांय वर्सां पयलीं ते निवृत्त जाल्ले. 2021 वर्सा तांकां ‘रक्तचंदन’ ह्या कवितांझेल्यां खातीर साहित्य अकादेमीचो पुरस्कार मेळिल्लो. ताचे पयलीं तांकां गोंय आनी मंगळुरुचे पुरस्कार फावो जाल्यात. तातूंत विमला पै, टीएमए पै, कोंकणी भाशा मंडळ हांच्या पुरस्कारांचो आस्पाव आसलो. हालींसराक तांणी मंगळुरुच्या विश्व कोंकणी केंद्राचो वावर सुरू केल्लो.
संजीव हांणी मराठी, कोंकणी दिसाळ्यां खातीर नेमान लिखाण केलें. आकाशवाणी खातीरूय तांणी नभोनाट्यां बरयलीं. तातूंतल्या वास्तू पुरुशाचो अस्त जातना ह्या नभोनाट्याक राष्ट्रीय पुरस्कार मेळिल्लो. तांचीं सगल्यांत गाजलीं ते ‘प्रेरणा रुख’ आनी ‘हाडामासाचीं देवळां’ हीं व्यक्तींचेर आदारीत पुस्तकां. भावझुंबर; मुंबर; गांवांतली सांज, पडवे वयली संवणी, चैतन्याच्यो पावळ्यो, अस्वस्थ सूर्य आनी हालींच तांचो उजवाडाक आयिल्लो कवितांझेलो ‘फुट्टात परतून पाखां’ हीं तांची कवितांचीं पुस्तकां. तांच्या मरणान कोंकणी साहित्य विश्वाचेर दुख्खाची सया पातळ्ळ्या.
मेल्वीन राॅड्रीगीश
कोंकणी चळवळ, साहित्य तशें कवितेक उर्बेचो खांबो कसो आशिल्ल्या संजीव वेरेंकाराच्या मरणान आघात जाला. नवे पिळगेच्या मुखले पंगतीर तो सदांच आशिल्लो, अशी आर्गां साहित्य अकादेमीच्या कोंकणी सल्लागार समितीचे निमंत्रक मेल्वीन राॅड्रिगीश हांणी ओंपल्यांत.
कोंकणी भाशा मंडळ
संजीव वेरेंकार हे एक उत्कृश्ठ कवी आशिल्ले. कोंकणी राजभास आंदोलनांत तांचें मोलादीक योगदान आसा. नायलॉन 66 आडच्या आंदोलनांत भूमिपुत्राचे सक्रीय भावनेन ते वावुरले. कोंकणी राजभास आंदोलनांत 1985 सावयवेरें-वळवय वाठारांत ज्या व्यक्तींनी म्हत्वपूर्ण योगदान दिलें तातूंत तांचो मोलाचो वांटो आसा. संजीव वेरेंकार वेवसायान पत्रकार आसले तरी पिंडान कवी. ते समाजीक जाणिवेचे एक बरोवपी. तांच्या मरणान कोंकणी साहित्य विश्वांत एक पोकळी निर्माण जाल्या. तांची पोटतिडक आनी तळमळ घेवन वावुरप हींच तांकां योग्य आर्गां आसतलीं, अशें कोंकणी भाशा मंडळान म्हणलां.
विश्व कोंकणी केंद्रांनूय तांकां आर्गां ओंपल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
