भांगरभूंय | प्रतिनिधी
नदरेंतल्यान भावना उक्तावपाची कुशळटाय तांचे कडेन आशिल्ली.
———————————-
अखेरेक ही-मॅन गेलो. अभिनेते धर्मेंद्रसिंह देओल भायर पडले. फाटल्या 60 वर्सांत गाजिल्ल्या नायकां मदले ते एक. अमिताभ, दिलीपकुमार, उपरांतच्या कमल हासन, नसिर हांचे सारके ते पेझाद अभिनेते नाशिल्ले, तांचो काळूय चाॅकलेट हिरोंचो. तरीय इतलीं वर्सां ते तिगले, हीट सिनेमा दिले. हाचो अर्थ धर्मेंद्र हांचे कडेन कितें तरी आशिल्लें. नाजाल्यार हिंदी सिनेमांत आयज भितर, तर फाल्यां भायर गेल्ले शेंकड्यांनी अभिनेते आसात. ‘सच्चाई को कोई पहचानता नहीं… लेकिन झूठ को सब सलाम करते हैं’, अशें धर्मेंद्र हांणी बरयलां, तेंच खरें. तांकां एकूय फिल्मफेअर पुरस्कार मेळूंक ना. निमाणो दिलो तो जिणेगौरव पुरस्कार. पूण, धर्मेंद्र सगल्यांक टक्कर दिवन उरले. तांणी फक्त तिडक नाकार दवरून हेडपी, तापट नायक रंगयलेच, पूण रोमँटीक, विनोदी नायकूय यशस्वी केले. तांची स्वताची संवाद शैली आशिल्ली. पूण अभिनयांत नाटकीपणां नाशिल्लो. नदरेंतल्यान भावना उक्तावपाची कुशळटाय तांचे कडेन आशिल्ली.
1960- 70 च्या दसकांत सगलेच नायक चाॅकलेट बाॅय म्हणटात तशे. तातूंत दमदार, रांगडेंपणाचें आकर्शण हें धर्मेंद्र हांचें वेगळेंपण थारलें. तांची ही- मॅन प्रतिमा जाली. मुखेल भुमिका मेळपाक लागल्यो. उपरांत अमिताभूय अशेच घडलें. ‘जंजीर’ गाजतकच ते अँग्री यंग मॅन जाले. धर्मेंद्र म्हणल्यार अॅक्शनाचें नवें मुखामळ. (सनी देओलाकूय उपरांत हो मान मेळ्ळो.) ते स्वता स्टंट करताले. फक्त मारपेटाच्योच न्हय, तर संवेदनशील पात्रांय तांणी गाजयलीं. तांची रडपाची शैली पसून आगळी. तांच्यो बऱ्योच भुमिका ‘अंडरप्ले’ म्हणूं येतात. ही मॅन प्रतिमा आनी सौम्य व्यक्तीमत्वाक लागून तांणी स्वताचे प्रेक्षक तयार केले. तातूंत बायलांय आशिल्लीं, हें विशेश. ‘सत्यकाम’ हो तांचो फ्लाॅप सिनेमा. मात तांचो सगल्यांत बरो अभिनय ह्याच सिनेमांत आसा, अशें भोवतेक समिक्षकांचें मत. ‘अनुपमा’ सिनेमांत तांणी उणें उलोवपी नायक रंगयलो. ‘बंदिनी’ तूय नवखे आसतनाय पेझाद भुमिका केली. ‘शोले’ चित्रपटांतूय तांचें वेगळेंच आंग दिसलें. जय जितलो शांत तितलो वीरू विनोदी, मस्तो, धाडशी. ही भुमिका धर्मेंद्र जगले. फूल और पत्थर, खामोशी, नौकर बिवी का, जानी दोस्त, रज़िया सुल्तान, कर्तव्य, शालीमार, धरमवीर, कुंवारा बाप, यादों की बारात, लोफर, सीता और गीता, गुड्डी, समाधी, मेरा गाँव मेरा देश… अशे सिनेमा तांणी केले. हेमा मालिनी वांगडा तांची जोडी जमली. उपरांत लग्नूय जालें.
मनीस म्हूण धर्मेंद्र नम्र, भावूक. 1- 2 सिनेमा केले काय सगल्यांचेच तकलेंत वारें भरता, मात धर्मेंद्र सगल्यां कडेन मोगान वागपी. तांचें मन सदांच गांवांत, सैमांत, शेतां, पोरसांनी आसतालें. पंजाबांत, लोणावळ्यांत तांचें फार्म हावस आसा. ट्विटराचेर ते गोरवां, बागकामाचे व्हिडियो घालताले. ‘शेतकाम म्हाका शांत दवरता, थंय हांव खरो धर्मेंद्र आसतां’, अशें तांणी एकदां म्हणिल्लें. चडश्यांक खबर ना, पूण ते कवीय आशिल्ले. मोग, यादी, सैम हे तांचे विशय. खास करून शेर, हो तांचो छंद. ‘दिल्लगी’ हो कवितांझेलो तांचो. तांच्या शेरोशायरीचें पुस्तक उजवाडाक येवंक जाय. ‘बसंती, इन कुत्तों के सामने मत नाचना, माँ का दूद पिया है तो…’ हे डाॅयलाॅगूय तांचे स्वताचे. ट्विटराचेरूय ते स्वता बरयताले. सैम आनी प्राण्यांची फोटोग्राफी तांची आवडटी. मदीं 2004 ते 2009 मेरेन ते भाजपाचे खासदारूय आशिल्ले. पड्ड्याचेर ही- मॅन आशिल्ले धर्मेंद्र कोणाक दुखोवपाकूय भियेताले, अशें तांचे इश्ट सांगतात. ‘कमबख़्त जान क्यों जाती है जाते हुए, पता नहीं कहां जाएंगे, कौन ले जाएगा।’ ही तांची हालींचीच निमाणी कविता. देह रुपान नासले, तरी सिनेमां वरवीं ते सदांकाळ रसिकांच्या काळजांत आसताले. तांकां आर्गां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
