भांगरभूंय | प्रतिनिधी
पणजीः कोंकणी काव्यां, भक्तीगितां, भावगितां, हरिकथा बरोवन आनी नाटकां सादर करून कोंकणी भाशेक भौसा मेरेन पावयली, अशें ज्येश्ठ लेखक आर. एस. भास्कर हांणी सांगलें.
श्री विवेकानंद धर्म प्रचरण संघ एर्नाकुलम संस्थेच्या रुप्या महोत्सवा निमितान कोची अमरावतीच्या जनार्धन कल्याण मंडप सभाघरांत एका दिसाचें शिबीर आयोजीत केल्लें. हे बलराज शेट यादस्तीक कार्यावळींत आर. एस. भास्कर अध्यक्ष ह्या नात्यान उलयताले.
आपूण शाळेंत शिकतना बिगर कोंकणी शिक्षकान कोंकणी भाशेक हिणसावन उलयले म्हूण तांचे कडेन तर्क जाले. हे घडणुकेंतल्यान आयिल्ली उमेद आपणाक कोंकणी भाशें विशीं सबार गिन्यान जोडपाक कारण जाली, अशें कवी बलराज शेट हांणी आपलो पयलो कविताझेलो ‘म्हांतारी आज्जी’ हातूंत बरयलां, अशें आर. एस. भास्कर हांणी सांगलें.
बलराज शेट हांणी कोंकणी प्रेमी मंडळ, भक्ती प्रेम भजन मंडळी संस्थेचे स्थापक म्हूण आनी केरळ कोंकणी अकादमीचे स्थापक सचीव म्हूण कोंकणी भाशे खातीर खूब काम केल्लें, अशेंय आर. एस. भास्कर हांणी सांगलें.
केरळ वैश्य समाज सरकार्यदर्शी जी. एस. महेष हांणी संमेलनाचें उक्तावण केलें.
पंढरीनाथ भुवनेन्द्र जनार्दन पुरस्कार जैतिवंत साहित्यीक श्रीकांत पै हांणी अनुस्मरण भाशण केल्ले. कवी बलराज हांणी स्वता खातीर कांयच जोडूंक ना. कोंकणी भास कला आनी संस्कृती खातीर जिवीत ओपलें, अशें श्रीकांत पै हांणी सांगलें. तांचे रचनेंत निर्धन लोकांची कथा आनी व्यथा हांचें बेस बरें चित्रण मेळटा, अशें तांणी सांगलें. वैश्य समाज कोची अध्यक्ष जी. आर.प्र साद, कुमारी रक्षीत अभिमन्यू शेटी (निवृत रब्बर बोर्ड प्रॉडक्शन कमिशनर) आनी जनार्दन देवस्थानाचे वेवस्थापक मंडळाचे वांगडी एस. आर. बिजू हांणी आपले विचार मांडले. सुरवेक गायत्री सायराम हांणी प्रार्थनागीत सादर केलें. केरळ वैश्य समाज सचीव रमेश अमरावती हांणी येवकार दिलो जाल्यार अमर सत संघ वांगडी यू. एस. शबरीनाथ हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
