कवी गुलजार, जगद्गुरू रामभद्राचार्य हांचो ज्ञानपीठ पुरस्कारान भोवमान

भांगरभूंय | प्रतिनिधी

नवी दिल्ली, खबरां संस्था ः राष्ट्रपती द्रौपदी मुर्मू हांणी शुक्रारा नवी दिल्लीच्या विज्ञान भवनांत जाल्ले कार्यावळींत संस्कृत पंडित जगद्गुरू रामभद्राचार्य हांकां 58 वो ज्ञानपीठ पुरस्कार भेटयलो. तशेंच पुरस्कार सुवाळ्याक हाजीर रावंक नाशिल्ले गुलजार हांकाय ज्ञानपीठ पुरस्कार मेळिल्ल्या खातीर परबीं दिलीं.
ह्या वेळार गुलजार हांची भलायकी रोखडीच पुरायपणान बरी जातली आनी ते सक्रीय जावन कला, साहित्य, समाज आनी देशांत योगदान दितले अशीं शुभेच्छा राष्ट्रपती द्रौपदी मुर्मू हांणी उक्तायली.
चित्रकूटांतल्या तुलसी पीठाचे संस्थापक आनी मुखेली रामभद्राचार्य हे उत्कृश्टतायेचे एक प्रेरणादायी उदाहरण आसा. शारिरीक नदरेन दिव्यांग आसून लेगीत तांणी आपल्या दिव्य नदरेक लागून साहित्य आनी समाजाची असामान्य सेवा केल्या.
साहित्य आनी समाजसेवे ह्या दोनूय मळार रामभद्राचार्याचें व्हड योगदान आसा. तांच्या गौरवशाली जिवितांतल्यान प्रेरणा घेवन फुडली पिळगी साहित्य निर्मिती, समाज निर्मिती आनी राष्ट्रनिर्माण ह्या मळार योग्य मार्गान मुखार वतली असो विस्वास राष्ट्रपतींनी उक्तायलो.
गुलजार हिंदी सिनेमांतल्या उल्लेखनीय वावराक लागून तांची नामना आसा. कविते खातीर लोकप्रिय आशिल्ले गुलजार हाकां 2002 वर्सा उर्दू खातीर साहित्य अकादमीचो पुरस्कार फावो जालो. तशेंच 2013 वर्सा दादासाहेब फाळके पुरस्कार, 2004 वर्सा पद्मभूषण आनी पांच राष्ट्रीय चित्रपट पुरस्कार मेळ्ळ्यात. आतां ज्ञानपीठ निवड समितीन शेनवारा गुलजार हांकां 58वो ज्ञानपीठ पुरस्कार जाहीर केलो.