भांगरभूंय | प्रतिनिधी
छापखान्यांत आधुनिकताय येवची म्हणून अशोकबाब वावुरिल्ले. छापणावळ खात्यांतल्या कर्मचाऱ्यांचो एकवट घडोवन हाडपाक ते जापसालदार.
केन्ना तरी कोणे तरी
कित्याक तरी पेटयली ही
चंद्रचुडी, चंद्रचुडी
फिती फिती नखेत्रां तीं
केन्ना तरी कोणे तरी
कित्याक तरी शिंपडल्यांत अशीं
चकचकतीं कलिकतीं
नखेत्रां तीं भुंयेर म्हजे
पडनात कशीं, झडनात कशीं?
दिशीं दिशीं रात निळी
रात पिशी मिणमिणटी
पणटी म्हजी वांगडी सोदी
केन्ना तरी कोणें तरी
कित्याक तरी पेटयली ही
जोत म्हजी जोत म्हजी
ही जोत कवीता कवीमनाचे सरकारी कर्मचारी अशोक भोंसलो हांची 2020 वर्सांतली. राजभास आंदोलना वेळार कोंकणीची घुडी कोंकणी भाशा मंडळाचे पणजेंतले कचेरेंतल्यान उंचायेर व्हरपांत अशोकबाब हांचो व्हड वांटो. ते सरकारी छापळावळ खात्याचे कर्मचारी. कोंकणीचेर अन्याय जाता तेन्ना कवितेंतल्यान आवाज उठोवपी, खबरो दिसाळ्यां मेरेन पावोवपी म्हणून ते यादींत उरतले.
राजभास कोंकणी सरकारी छापणावळ खात्या मेरेन पावोवपाकच न्हय खात्यांत, छापखान्यांत आधुनिकताय येवची म्हणून अशोकबाब वावुरिल्ले. छापळावळ खात्यांतल्या कर्मचाऱ्यांचो एकवट घडोवन हाडपाक ते जापसालदार. खात्यांतले अधिकारी, कर्मचाऱ्यांचीं प्रमोशनां, सस्पेन्शनां, चुको खबरांपत्रां मेरेन पावोवपी म्हणून पत्रकारांक तांची वळख.
दिसाचे सरकारी छापखान्यांत काम करप, तिनसांजेर कोंकणी भाशा मंडळाचे पणजे कचेरेंत वचप, आकाशवाणीवर खबरो दिवप, आकाशवाणीचे अधिकारी नागेशबाब करमली हांचे मेरेन खंय कितें घडलां ते कळोवपय अशोकबाबान बेस बरे तरेन केलां.
राजभास कोंकणी आंदोलना खातीर जावपी बसकांनी सुचोवण्यो करतनाच रातयां पत्रकां दारांचेर लावप, रस्त्यांचेर बसकेची म्हायती दिवपी वळी पितारप हें अशोकबाब आनी सांगात्यांचें काम.
सुटये दिसा गांवागांवांनी जावपी बसकांनी, कवी संमेलनां, साहित्य मेळांनी अशोकबाब हाजीर रावताले. भेस सादो, खांद्याक बटवो, सायकलीन आझाद मैदाना लागसल्ल्या छापणावळ खात्यांत येवपी, कचेरी आशिल्ले सुवातेचे पासयेर उबो रावन हेर कर्मचाऱ्यां वांगडा खबरी मारपी, तिडक उक्तावपी, इश्टां कडेन मेकळेपणान उलयतना गाळी घालपी अशोकबाब ताच्या इश्टांक खबर आसतले.
राजभास आंदोलनाचे दीस सोंपले, कोंकणी राजभास जाली तेन्ना अशोकबाबान आपल्या साहित्यांतल्यान कोंकणीचे सेवेक ओंपून घेतलें. सरकारी छापखान्यात कोंकणी सगल्या कर्मचाऱ्यांक येवची, आधुनिक यंत्रावळ खात्यांत येवची म्हणून वावुरप्या मदीं अशोकबाब पयले सरकारी कर्मचारी. उंचेल्या पावंड्यावेल्या अधिकाऱ्यां कडेन कोंकणी उलोवपी, कोंकणी कडेन एकनिश्ठ रावपी कवीमनाचे सरकारी कर्मचारी प्रशासनात आसतले. राजभास आंदोलनातल्यान घडिल्ले, व्हड जाल्ले कवी म्हणून अशोकबाब नामना जोडूंक पावले सेवेंतल्यान रिटायर जाल्या उपरांत.
नागेशबाब, शंकर भांडारी, शंकर रामाणी, मनोहरराय सरदेसाय, बाकीबाब बोरकार, पुंडलीक नारायण नायक हांच्या कवितांच्या सांगातांत अशोकबाब पासये वेल्यान चलत भोंवपी. पणजेंत कॅफे प्रकाश, वर्षा बुक स्टाॅला लागीं कोंकणी भाशा मंडळाची कचेरी आशिल्ले बिल्डींगेंत आंदोलनाच्यो बसका जाताल्यो. आंदोलना वेळार पणजेंत आल्तिन, भाटले, सांनिनेज, मळ्यांतल्या वाठारांतल्या कवी, लेखकांक एकठांय हाडपी अशोकबाब कवी संमेलनाचे माचयेर बोवाळ घालपी, नाटकुलींय बरोवपी. समाजिक प्रस्न, सैम, कोंकणीची पोटतिडक तांचे कवितेंत दिसता. तांकां आर्गां.
सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
