भांगरभूंय | प्रतिनिधी
रामदास नायक : कविता वाचन सर्तींत सियाना गांवस पयलें
भांगरभूंय । प्रतिनिधी
वाळपय : कविता लेखना खातीर खूब वाचनाची गरज आसता. कवीची नदर वेगळी आसता. वेगवेगळ्या घडणुकांनी तांचो पळोवपाचो दिश्टीकोन वेगळो आसता. हे खातीर तांच्या लेखनांतल्यान बरे तरेची कविता जल्माक येता. हे खातीर निरिक्षक करतना आपले पद्दतीन करात. आपले पद्दतीन कवितेची मांडणी करात. कवितांच्या माध्यमांतल्यान आपल्याक नांव मेळटा, तेचवरी आपले जिणेक बरे तरेचो आकार मेळटा, अशें वाळपय सरकारी उच्च माध्यमीक विद्यालयाचे शिक्षक रामदास नायक हांणी सांगलें. वाळपय सुपर स्कूल कॉम्प्लेक्स 2 आयोजीत कोंकणी- मराठी कविता वाचन सर्त आयोजीत केल्ली. ह्या वेळार ते उलयताले.
ह्या वेळार माचयेर शिक्षिका स्नेहा वेलिंगकार, वाळपय उच्च माध्यमीक विद्यालयाची शिक्षिका सुवर्णा साळगांवकार, स्नेहा नायक, स्मिता गाड हाजीर आशिल्ली.
स्नेहा वेंलींगकार हांणी सांगलें, विद्यार्थ्यांक हेर कवींच्यो कविता सादर करपाची कला आपणावची. ते खातीर यूट्युबा वयल्या व्हिडिओंची मजत घेवची.
स्वता कविता बरोवन संमेलनांत वांटो घेवचो, अशी सुचोवणी सुवर्णा साळगांवकार हांणी केली.
स्मिता गाड हांणी विद्यार्थ्यांक कविता सादर करपाची कुशळटाय सांगून मार्गदर्शन केलें. तशेंच शिक्षक हरीश कामत हांणी कविता सादरीकरण केलें.
कविता वाचन सर्तींत अवर लेडी ऑफ लुर्डस हायस्कूल वाळपयची विद्यार्थिनी सियाना गांवस हाका पयलें, सरकारी माध्यमीक विद्यालयाची विद्यार्थिनी रतिका गांवकार हाका दुसरें जाल्यार सरकारी माध्यमीक विद्यालयांतली विद्यार्थिनी श्रावणी गांवकार हाका तिसरें इनाम मेळ्ळें. तशेंच युनिटी हायस्कूल वाळपयची सानिया देसाय, सरकारी माध्यमीक विद्यालय वाळपयची तन्वी कोलाप्ते आनी सरकारी माध्यमीक विद्यालय भुंयपालची सृष्टी च्यारी हांकां उमेद वाडोवपी इनामां फावो जालीं. कविता सर्तीचें परिक्षण शिक्षिका स्नेहा नायक आनी स्मिता गाड हांणी केलें. शिक्षिका दीक्षिता गांवस हांणी सुत्रसंचालन केलें आनी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
