भांगरभूंय | प्रतिनिधी
ह्रदयनाथ तांबोसकारः पेडण्यां जालें भोवभाशीक कविसंमेलन
भांगरभूंय । प्रतिनिधी
पेडणें: कविता लेखनाक अभणवाची शिदोरी जाय. शिरोदींतले भोव आयामी अणभव समाजांतल्या विवीध घटकां पासून मेळपाक शकतात. सर्जनशील कविते खातीर कवीन विचारशक्तीक आनी कल्पना विश्वाक चालना तशेंच उबारी दिवप तितलेंच गरजेचें आसा, अशें कवी ह्रदयनाथ तांबोसकार हांणी सांगलें.
कोंकण मराठी परिशद गोंय हांणई पेडण्यां भगवती हायस्कुलाच्या सभाघरांत काव्यसंध्या हें भोवभाशीक म्हयनाळें कविसंमेलन आयोजीत केल्लें. ताचें उक्तावण केले उपरांत तांबोसकार उलयताले.
ह्या वेळार माचयेर कविसंमेलनाचे अध्यक्ष कवी मुरलीधर बर्डे, कोंमपचे अध्यक्ष सुदेश आर्लेकार, कार्यवाह अक्षता किनळेकार, विशेश निमंत्रीत प्रवीण कोटकार, काव्यसंध्या उपक्रमाची संयोजक शितल साळगांवकार, कवयित्री वनिता मयेंकार आनी कविसंमेलनाची पेडणें म्हाल निमंत्रक शुभा घोडगे हाजीर आशिल्ली.
कविता लेखना खातीर कवीची मानसीक स्थिती सदांच बरी आसपाक जाय. ती तशी आसल्यारूच सकस साहित्य निर्मीती जावपाक शकता. तेच वांगडा सरभोंवतणचें वातावरण लेगीत कवीचे नदरेन सकारात्मक आसचें पडटा. गायन, तबलें वादन अशा हेर कला परींच आपूण कविता लेखनांत गुल्ल जालों जाल्यार व्यसनां लागीं पसून येवपाक शकचीं ना, अशें तांबोसकार हांणी सांगलें.
सुत्रसंचालन अक्षता किनळेकार हांणी केलें. सुदेश आर्लेकार हांणी पुस्तक भेट दिवन येवकार दिलो. शितल साळगांवकार हांणी उपकार मानले.
ह्या भोवभाशीक कविसंमेलनांत कोंकणी आनी मराठी कविता सादर केल्यो. तरणे पिळगेंतल्या कवी- कवयित्रींनी ह्या कविसंमेलनाक उत्स्फूर्त प्रतिसाद दिलो. मुरलीधर बर्डे, ह्रदयनाथ तांबोसकार, शितल साळगांवकार, वनिता मयेंकार, शुभा घोडगे, अक्षता किनळेकार हांणी वैशिश्टपूर्ण कविता सादर केल्यो. तेच वांगडा गोविंद पोके, अलिशा गडेकार, प्राची नायक, पी. ए. सुर्यवंशी, संतोष महाले, दशरथ परब, उमेश आगरवाडेकार, अनंत नायक हांणीय आपल्यो कविता सादर केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
