भांगरभूंय | प्रतिनिधी
मॅल्वीन रॉड्रिग्स: अन्वेषा सिंगबाळ हांच्या ’आसोर’ आनी ’चांफो’ कविता झेल्याचें प्रकाशन
पणजी: कवीन कविता बरयतना तातूंत स्वताचे विचार घालचे. तांणी हे विचार मांडपाक भरपूर वाचन, घडणुके विशीं संशोधन करचें. अशो कविता हेर कवितां परस वेगळ्यो थारतात. ती कविता कवीक मानसीक सुख दिता, अशें ज्येश्ठ साहित्यीक मॅल्वीन रॉड्रिग्स हांणी सांगलें.
लेखक आनी कोंकणी कार्यकर्ती अन्वेषा सिंगबाळ हांच्या ’आसोर’ आनी ’चांफो’ ह्या दोन कविता झेल्याचो प्रकाशन सुवाळो हालींच मडगांव रवींद्र भवनाच्या सभाघरांत जालो. ह्या वेळार रॉड्रिग्स मुखेल सोयरे म्हणून उलयताले.
कोंकणी दरेका सामान्यां मेरेन पावोवप गरजेचें. समाजीक चळवळ, साहित्य मंथन, गांवगिर्या संमेलनांनी वांटेकार जावपा वांगडा दरेका लेखकान स्वता संस्था जावपाक जाय, अशें मत गोपीनाथ गांवस हांणी उक्तायलें.
ह्या वेळार मानाचे सोयरे म्हणून लेखक आनी लोककलाकार गोपीनाथ गांवस हाजीर आशिल्ले. तशेंच अध्यक्षाचे सुवातेर लेखक आनी कोंकणी कार्यकर्ते चेतन आचार्य आनी दिनेश मणेरकार हाजीर आशिल्ले.
लेखिका अन्वेषा सिंगबाळ हांच्या लिखाणाची आनी पुस्तकाची गोपीनाथ गांवस हांणी ह्या वेळार तोखणाय केली.
कला ही अभिव्यक्तीचें साधन. आपले प्रतिभाशक्तीक लागून दरेक कलाकार सामान्यां परस वयर आसता. लेखकाच्या साहित्यांतल्यान स्वता परस हेरांक चड मजत जाता. लेखकाचो प्रभाव वाचकांचेर पडतूच आसता, अशें कोंकणी चळवळींतले कार्यकर्ते चेतन आचार्य हांणी सांगलें.
आंकड्या परस दर्जो म्हत्वाचो. सामान्य विचारांक असामान्य करप हें लेखकाचेर निंबून आसता. ही कला जाका जमता तो म्हान लेखक जाता. खंयचेय कले खातीर भावना गरजेच्यो. जाल्यारूच सृजनात्मक लेखन निर्माण जाता. अन्वेषान बंधनांकडेन आडनदर करून बरयलां, अशें आचार्य हांणी म्हणलें.
ह्या वेळार अन्वेषा सिंगबाळ हांणी आपलें मनोगत उक्तायलें आनी कार्यावळीक हाजीर आशिल्ल्या सगळ्यांचे उपकार मानले. येवकाराचें उलोवप दिनेश मणेरकार हांणी केलें. कार्यावळीचें सुत्रसंचालन ब्रिजेश देसाय हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
