कविता अणभवांतल्यान निर्माणजावपाक जाय : माधव सटवाणी

भांगरभूंय | प्रतिनिधी

सुरेश बायेंकार आयोजीत आठवें कवी संमेलन उमेदीन

दिवचल: सैम आपले तरेन चलता. पूण, मनशान सैमा आड काम करपाक सुरू केलां. हे समाजा खातीर धोक्याचें आसा. दरेकल्यान सैमाच्या मोगांत पडपाची गरज आसा. तशेंच कविता अणभवांतल्यान निर्माण जाल्यार ती खूब प्रभावी जाता आनी तिचें सादरीकरण उत्कृश्ठ तरेन जाल्यार सगळ्यांच्या तोंडांतल्यान बरीच तोखणाय आयकुपाक मेळटा, अशें मत ज्येश्ठ साहित्यीक माधव सटवाणी हांणी उक्तायलें.
बायेंकर न्युज, दिवचल पत्रकार संघ, सुर्ला ग्रामपंचायत मंडळ आनी श्री सत्यनारायण कृपाप्रसाद सांस्कृतीक मंडळ सुर्ला हांच्या जोड पालवान आयोजीत कडचाळ – भायलीफाळ सुर्ला 8 व्या कवी संमेलनांत श्री सांतेरी सत्यनारायण देवस्थान सभाघरांत माधव सटवाणी अध्यक्ष सुवाते वेल्यान उलयताले.
दिवली पेटोवन कार्यावळ सुरू जाली. हे कार्यावळीक मुखेल सोयरे ह्या नात्यान गोपाळ सुर्लकार (जिल्हो पंचायत वांगडी) हाजीर आशिल्ले. तशें दिवचल पत्रकार संघ अध्यक्ष रविराज चारी, सांतेरी सत्यनारायण देवस्थानाचे अध्यक्ष आनंद फोंडेकार, थळावे पंच सुभाष फोंडेकार, सत्यनारायण कृपा प्रसाद सांस्कृतीक मंडळ अध्यक्ष मनोहर वळवयकार, पत्रकार सुरेश बायेंकार, तुळशीदास फोंडेकार हाजीर आशिल्ले.
पत्रकार मळार आपली अशी वेगळी सुवात निर्माण करपी सुरेश बायेंकार हे फाटल्या आठ वर्सां सावन सांखळे मतदारसंघांत विवीध सुवातांचेर आपल्या इश्टांचे मजतीन कवी संमेलनाचें आयोजन करता. हे खातीर तांचें आनी कविता सादर करपी सगळ्यांक परबीं. तशेंच खंयच्याय मळार एकवट गरजेचो, अशें मत जिल्हो पंचायत वांगडी गोपाळ सुर्लकार हांणी उक्तायलें.
कवी संमेलनांत महादेव गांवकार, विशाल गांवस, ओंकार नायक, सान्वी खांडेपारकार, कान्वी माईणकार, कांती माईणकार, तेजस्वी गांवकार, आकाश गांवकार, संध्या गांवकार, लक्ष्मण गुरव, मुकूंद मळगांवकार ह्या कवींनी वांटो घेवन आपापल्यो कविता सादर केल्यो.
कवी आनी नवे नाट्य लेखक हर्ष सातोडकार हांकां आयोजकां कडल्यान यादस्तीक भेटोवन साहित्यीक माधव सटवाणी हांचे हस्तुकीं भोवमान केलो. सुत्रसंचालन दुर्गदास गर्दे हांणी केलें. तशेंच सोयर्‍यांक येवकार सुरेश बायेंकार हांणी दिवन उपकार मानले.