भांगरभूंय | प्रतिनिधी
नाल्ल हें एक वळखीचें फळ. तें सगळ्यांकूच आवडटा. भारतीय संस्कृतायेंत एकमेकांचो सत्कार करपा खातीर नाल्लाचो उपेग करतात. हें फळ शुभ मानतात.आयज लेगीत देवघरांत नाल्लाच्या फळाची व्हडा श्रद्धेन पुजा करतात. जायत्या देवळांनी ताचो उपेग करतात. ह्या झाडांचो इतलो उपेग आसा की ताचो खंयचोच वांटो फुकट वचना. ताचें उदक, खोबरें, सोय, तेल वापरतात. ताच्या पानांपसून तण, पाटलो, घराचें पांखे, शेंदरी आनी दोरयो तयार करतात, खोडाचो उपेग अलंकार आनी फर्निचर तयार करपा खातीर करतात, नाल्लाची कट्टी उजो पेटोवपाक उपेगी पडटा. ताचो उपेग इंधन म्हूण करपाक मेळटा. नाल्लाचीं सोडणां लासून जळारांक धांवडायतात. देखूनच नाल्लाक भारतीय संस्कृतायेंत कल्पवृक्ष म्हण्टात.
संवसारांतल्या ८० देशांनी माडाच्यो १५० परस चड जाती आसात. नव्या झाडांक फळां येवपाक ५ ते ६ वर्सां लागतात. झाडाचें फळ पिकपाक एक वर्स लागता. दर वर्सा नाल्लाचें उत्पादन ६.१ कोटी टन इतलें व्हड आसता.
रानांत हें नाल्लाचें झाड १०० वर्सांमेरेन जियेवंक शकता. नाल्लाचें फळय दर्यांत उफेवंक शकता. जुंव्याचेर आडकून पडल्यार नाल्ल हो तुमचो सगळ्यांत बरो इश्ट. आयज भारत, फिलीपीन्स, ब्राझील, श्रीलंका आदी साबार देशांनीय नाल्ल निर्यात करतात.
माड विषुववृत्तीय आनी उश्ण कटिबंधांत वाडटात. माड मुखेलपणान दर्यादेगेर आसतात. तो ३० मिटर उंचाये मेरेन वाडटा. भारतांत जायत्या सुवातींनी नाल्लाचें उत्पादन जाता. गोंय, केरळ, कर्नाटक, आंध्र प्रदेश, तमिळनाडू, अस्तंत बंगाल, ओरिसा ह्या राज्यांनी नाल्ल पिकयतात. आयज भारताचो नाल्लाच्या उत्पादनांत संवसारांत तिसरो क्रमांक आसा. संवसारांतल्या नाल्लाच्या उत्पादनांतलें ९० टक्के उत्पादन फकत आशियांत जाता. एका माडाक सादारणपणान एका वर्सांत उणेंच १०० ते १५० नाल्ल तयार जातात. संवसारांत इंडोनेशिया, फिलीपीन्स, ब्राझील,श्रीलंका ह्या देशांनी व्हड प्रमाणांत नाल्ल तयार करतात. माडाचे वेगवेगळे उपेग आसात. नाल्ल अन्न पदार्थांत व्हड प्रमाणांत वापरतात. आडसर खूब वखदी मानतात, तातूंत उर्जा भरपूर आसता आनी खनिजांय. दुयेंत आनी अपचन जाल्ल्या मनशांक तो उपेगी पडटा. हाचे भायर माडा पसून माडी तयार करतात. ती थंड आनी खूब गोड आसता. दर्याचे देगेर माड भरपूर प्रमाणांत दिसतात. कात निवळ आनी गुळगुळीत दवरपाखातीर नाल्लाचें तेल वापरतात. गर्भधारणे उपरांत दोन ते तीन सप्तकां उपरांत हें तेल घेतल्यार भुरग्याची तेजस्वीताय वाडटा. तशेंच टॉनिक म्हणूनय उपेगी पडटा. नाल्लाचें तेल काळजाक खूब फायदेशीर. केंसांचेर नेमान लायल्यार केंस मोव जातात. तशेंच केंस वचपाचें प्रमाण उणें करता. वजन उणें करपा खातीरय उपेगी पडटा. मेंदवाची तांक वाडयता. ह्या तेलांत मेंदू शक्तीमान करपाचे गूण आसतात. याद, बुद्धी तल्लख जावंक तें खूब उपेगी पडटा. एकूणच नाल्लाच्या तेलांत वखदी गुणधर्म खूब आसतात.
एका नाल्लांत २०० मिलिलीटर उदक आसता. तातूंत रेडियम आनी कोबाल्ट हांचो आस्पाव जाता. ताका लागून रोगप्रतिकार शक्त तयार जाता. कॅन्सर सारकिल्ल्या दुयेंसांचेर उपाय म्हणून नाल्लाचें उदक पियेवपाची सुचोवणी जायते दोतोर करतात. कोरोना काळांत लेगीत जायत्या दोतोरांनी कोरोनाचेर उपाय म्हणून नाल्लाचें उदक सुचयलें.
संवसारीक नाल्ल दीस 2009 वर्सा सावन संवसारभर मनयतात. आशिया पॅसिफीक कोकोनट काॅम्युनिटीचें मुखेल कार्यालय जकार्ता हांणी पयलेच खेपे हो दीस मनोवपाक सुरवात केली. नाल्लाची लागवड करपाक प्रोत्साहन दिवपा खातीर, तशेंच लोकां मदीं ताचे विशीं जागृताय निर्माण करपा खातीर, तांणी हें पावल उखलिल्लें. नाल्लाचें म्हत्व ह्या दिसा सांगतात. लोकां मदीं नाल्ला विशीं जागृताय निर्माण करपाचो हो दीस.
आयज लेगीत शारांतल्या जायत्या सुवातींनी माड व्हड प्रमाणांत दिसतात. आयज ह्या नाल्ल दिसा निमतान नाल्लाचे जायते फायदे लोकां मेरेन पावोवया आनी ताचो चडांत चड उपेग करुया. नवे कवाथे लावया, होच ह्या दिसाचो खरो संदेश.
शांताराम वाघ
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
