भांगरभूंय | प्रतिनिधी
भांगरभूंय । प्रतिनिधी
फोंडेंः कवळेंच्या श्री शांतादुर्गा शिक्षण समितीच्या शांतादुर्गा गुरुकुलांत पंचकोश प्रणालीचेर चिंतन परिशद जाली. ज्ञानप्रबोधिनी गुरुकुल निगडी पुणेच्या प्रा. आदित्य शिंदे आनी प्रा. श्रीकृष्ण अभ्यंकर हांणी ह्या वेळार मार्गदर्शन केलें. परिशदेक शांतादुर्गा शिक्षण समितीचो अध्यक्ष कुमार सरज्योतिषी, गुरुकुलाचो उपाध्यक्ष नारायण नावती आनी सागर हाजीर आशिल्ले.
पंचकोश विकसन म्हणल्यार किदें, विद्यार्थ्यांची पुराय वाड कित्याक जायना, देशाचो फुडार घडोवपी विद्यार्थी तयार जावपा खातीर ताची परिपूर्ण वाड जावपाक जाय. ह्या सगल्यांची जाप सोदन हाकाच पंचकोश विकसन म्हणटात आनी तो वावर गुरुकुल करता. अन्नमय कोश, प्राणायाम कोश, मनोमय कोश, विज्ञानमय कोश आनी आनंदमय कोश ह्या पांचूय कोशांची उदरगत करपाची शिक्षण प्रणाली गुरुकुलांक चालीक लायतात अशें श्रीकृष्ण अभ्यंकर हांणी सांगलें.
फुडली पिळगी दुर्बळ आसची न्हय ती सकारात्मक जावपी हे खातीर पंचकोश विकसन शिक्षण प्रणाली सध्याच्या तेपार आनी फुडले शिक्षणीक वाटचाली खातीर मुळावी गरज आसा. दरेका पालकान शांतादुर्गा गुरुकुलाचो लाब आपल्या भुरग्यांक मेळोवन दिवचो अशें आवाहन नारायण नावतीत केलें. ज्ञानप्रबोधिनी निगडी गुरुकुलाचे आठवे यत्तेंत शिकपी आदित्यराज आरावडे आनी आर्य थोरवे परिशदेक हाजीर आशिल्ले. दरेका विद्यार्थ्यान विचारिल्ल्या प्रस्नांक तांणी समर्पक जापो दिवन सगल्यांक अजापीत केलें. ज्ञानप्रबोधिनीचे विद्यार्थी ल्हान पिरायेचेर स्वताचे ध्येय थारावन ते खातीर कशी तयारी करतात हें हजर आशिल्ल्याक ह्या वेळार कळ्ळें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
