भांगरभूंय | प्रतिनिधी
पणजी: विधवांचे बाबतींत जावपी भेदभाव पयस करपा खातीर राज्य सरकारान कळाव करिनासतना ‘विधवा भेदभावा आड’ कायदो करचो आनी तांकां मान दिवचो अशी मागणी विरोधी पक्ष फुडारी युरी आलेमाव हांणी परत केल्या.
कुंकळ्ळीचे आमदार आलेमाव हांणी सांगलें, राज्यांतलो विधवा भेदभाव, वायट वागणूक आनी तांकां समाजा पसून पयस दवरपाच्यो अन्यायी प्रथा आडावपा खातीर तांणी हाडिल्ल्या खाजगी वांगड्यांच्या थारावाक सुमार दोन वर्सां जावन गेलीं, मात सरकारान ताचेर आजून कांयच करूंक ना.
‘‘हांवें ३१ मार्च २०२३ दिसा हो मुद्दो हजर केल्लो. आयज २२ म्हयने जावन गेले तरी सरकार ह्या अन्यायी प्रथांक आळो घालपा खातीर कायदो हाडटलें अशीं फकत आस्वासनां दिता. म्हाका सांगिल्लें, विधवा प्रथे विशीं धोरणाचो मसुदो तयार जाले उपरांत सरकार रोखडेंच कायदो हाडटलें. मात, सरकार आपलो शब्द पाळपाक अपेशी थारलां, अशें युरी हांणी सांगलें.
कांय ग्रामपंचायतींनी ह्या कालबाह्य आनी मनीसपणा भायल्या रूढीं आड थाराव संमत करून विधवांक लग्न जाल्ल्या बायलां वरीं समान वागणूक मेळची अशी मागणी केल्ली. मरणा उपरांत मनशाचे प्रतिश्ठेचो आदर करप गरजेचें. निमण्या संस्कारां वेळार मरण आयिल्ल्या मनशाचे कपडे काडपाची प्रथा मरण आयिल्ले व्यक्तीचो अपमान करपी आसा. ही अन्यायी प्रथा आडावपाक सरकारान कायदो हाडपाचो विचार करचो अशेंय आलेमाव हांणी म्हणलें.
हालींच सोंपिल्ल्या विधानसभा अधिवेशनांत आलेमाव हांणी ह्या विशयाचेर सरकारा कडेन जाप विचारली. ताका जाप दितना सरकारान सांगलें, विधवा प्रथां विशीं धोरणाचो मसुदो तयार केला. हे विशीं आमी लागसारच्यान काम करतात, अशें आस्वासन सरकारान दिलां.
‘‘म्हाका आस्त आसा, सरकार हे प्रक्रियेक आनीक उशीर करचें ना. फुडल्या विधानसभा अधिवेशना मेरेन सगळे निर्णय घेतले आनी हो कायदो प्रत्यक्षांत येतलो,’’ अशी अपेक्षा आलेमाव हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
