भांगरभूंय | प्रतिनिधी
कर्नाटकाच्या कळसा प्रकल्पा खातीर केंद्राची आडखळ
पणजी : कळसा प्रकल्पा खातीर नेरसे हांगची 28.44 हॅक्टर जमनीच्या रुपांतरणा खातीर कर्नाटकान जैवविविधताय जतनाय आराखडो सादर करपाची अट घाल्या. हो आराखडो सादर केले उपरांतूच प्रकल्पाक मान्यताय दिवपाचे केंद्रान थारायलां.
केंद्रीय रानां आनी पर्यावरण मंत्रालयाच्या (एमओईएफ) प्रादेशीक समितीची (आरईसी) बसका जाली. हे बसकेंत कळसा प्रकल्पा खातीर नेरसे हांगच्या 28.44 हॅक्टर जमीन रुपांतरणाच्या प्रस्तावाचेर चर्चा जाली. हे रान भीमगड अभयारण्या सावन 0.029 किमि अंतराचेर आसा. तशेंच ह्या रानांत वाग, शिंव तशेच हेर रानां जीव आनी झाडांचो आस्पाव आसा. हाका लागून प्रकल्पाक मान्यताय दिवचे पयलीं कर्नाटकान जैवविविधताय जतनाय आराखडो सादर करचो. प्रकल्पाचो रानां जीव आनी हेर जैव विविधतायेचेर कितल्या प्रमाणांत परिणाम जातलो, ताचो अहवाल वायल्ड लायफ वॉर्डनान सादर करपाक जाय. तशेंच समिती ह्या जाग्याची पळोवणी करतली.
खानापूर जिल्ह्यांत नेरसे गांवांत 28.44 हॅक्टर जमनीचेर कळसा प्रकल्प उबारपाचो प्रस्ताव आसा. पंप हावज, सबस्टेशन, पायपलायन, घालून उदक हुबळी – धारवाड व्हरपाचो हेत आसा. हाचे खातीर कर्नाटकान मान्यताय मागल्या. हो जागो भिमगड अभयारण्या भायर आसा. रानां जिवांचेर प्रकल्पाचो कसलोच परिणाम जावचो ना, असो कर्नाटकाचो दावो आसा.
कळसा प्रकल्प हो म्हादयचे उदक घुंवडावपा खातीरचो प्रकल्प आसा. हाका गोंयचो विरोध आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
