भांगरभूंय | प्रतिनिधी
दोडामार्ग: गोंयच्या फोंडये वाठारांतल्यान मायनिंग मर्गान कळणे गांवांत बुधवारा सांजेवेळार दाखल जाल्लो ओंकार हतयान रातीं बरींच धुमशेणां घालीं. शेतकार शाहिर इस्माईल खान हांच्या शेतांत बांदून दवरिल्ल्या पोशिल्ल्या जनावरां कडेन ओंकार पावलो. तांणी अचकीत त्या पोशिल्ल्या जनावरांचेर हल्लो केलो. ह्या हल्ल्या वेळार रान खात्याच्या कर्मचार्यांनी दोन बांदिल्ल्या गोरवांक सोडिल्ल्या तांचो जीव वाटवलो. मात थंय बांदिल्ल्या तिसर्या बैलाचो जीव ओंकार हतयाक लागून गेलो.
हती आक्रमक जाल्ल्याचें लक्षांत येतांच रान खात्याच्या कर्मचार्यांनी दोन गोरवांक बांदिल्लीं दावीं सोडयलीं. मात हातांत कोयतो नाशिल्ल्यान तिसर्या बैलाचें दावें कापपाक मेळ्ळें ना. मजगतीं, तिडकल्ल्या ओंकार हतयान ह्या बैलाचेर नेटान हल्लो केलो. ताची मान आनी पांय मोडून ताका गंभीर जखमी केलो. हातूंत तळमळून त्या बैलाक मरण आयलें.
हल्ल्या उपरांत हतयान ह्या वाठारांतले केळी बागायतीचें व्हड लुकसाण केलें. हे विशींची म्हायती मेळटांच रान अधिकारी घडणुके सुवातेर वचून पंचनामो केलो. सावंतवाडी म्हालांत कांय दिसां आदीं एके म्हशीचो बळी गेल्लो. ताच्या हल्ल्यांत गोरवांक मरण येवपी ही दुसरी घडणूक. हाका लागून कळणे आनी आशिकुशीकच्या भागांत शेतकरी वर्गांत भंयाचें वातावरण निर्माण जालां. हती फुडें भिकेकोनाळ दिकेन गेल्ल्याचें लोकांनी कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
