कळंगूट राजभर खून प्रकरणांतले दोग दुबावीत आरोपी अजून फरार

भांगरभूंय | प्रतिनिधी

म्हापशें: तिवायवाडो- कळंगूटे वैयक्तीक वादांतल्यान जाल्ल्या राजभर रविनारायण रामदर्शनभाई (27, सुरत गुजरात) ह्या तरणाट्याच्या खून प्रकरणांतले फरार आशिल्ले दोग दुबावीत आरोपी अजून पुलिसांच्या हाताक सांपडिल्ले नात.

मुखेल दुबावीत आरोपी कोमल उत्तम बरसकर (28, मध्य प्रदेश) हाका पुलिसांनी घडणुकेच्या दिसाच वास्को सावन अटक केल्ली. तशेंच आयपीएल क्रिकेट बेटिंगे खातीर आयिल्ल्या ह्या पंगडांतल्या हेर 15 जाणांक पुलिसांनी अटक करून तांची जामिनार सुटका केल्या.

ही खुनाची घडणूक शेनवारा 28 वेर सकाळीं 6 वरांच्या सुमाराक तिवायवाडो- कळंगूटे रिसॉर्ट सांता मोनिकांत घडली. शेनवारा 28 सावन सुरू जाल्ल्या क्रिकेट इंडियन प्रिमियर लीग सर्तींत सट्टेबाजी करपा खातीर 19 जाणांचो पंगड गोंयांत आयिल्लो आनी तिवायवाडो- कळंगूटे कासा दी कॅजिनो गेस्ट हावस ह्या हॉटेलांत देंविल्लो. ह्या पंगडान हॉटेलाच्यो चार कुडी आरक्षीत केल्ल्यो.

घडणुकेच्या वेळार मयत राजभर, कोमल आनी हेर दोग अशे चार जाण कुडीचे भायर गॅलरींत सोरो पिवपा खातीर बशिल्ले. जाल्यार हेर आपआपले कुडीत आशिल्ले.

सोऱ्याचे घुंवळेंत राजभर आनी कोमल हांचे मदीं वाद जालो. मयत दुबाविताक ताचे मोगिके वेल्यान चाळोवंक लागलो. तशेंच तिचो फोटू दाखोवपाचो ताणें आग्रो धरलो. दुबावीत कोमल हो फोटो दाखयना हें पळोवन ताणें ताचे मोगिके विशीं आक्षेपार्ह आनी अश्लील टिप्पणी केली. ताचे वेल्यान हें प्रकरण मारपेटीचेर गेलें आनी दुबावितान कुडीतल्यान सुरी हाडली आनी मयताचेर हल्लो केलो.

तेचबराबर राजभर हो जीव वाटावपा खातीर धांवलो. ताचो दुबावीत आनी हेर तिगांनी फाटलाग केलो. घडणूक थळार रिसॉर्टांत ताणें आलाशिरो घेतलो. मात दुबावितांनी स्विमींग पुला कुशीक राजभराक धरलो आनी दुबावितान ताच्या हड्ड्यार आनी पोटार सुरयेन वार केले. तातूंत रक्तस्राव जावन ताका जाग्यारूच मरण आयिल्लें. घडणुके उपरांत दुबावीत कोमल बरसकर आनी त्या दोगांनी घडणूक थळा वेल्यान पळ काडली.

दुबावीत कोमल हो भाड्याचे टॅक्सीन वास्को गेलो. रेल्वे मार्गान पळ काडपाचो ताचो यत्न आशिल्लो. पूण कळंगूट पुलिसांनी ताका धरून अटक केली. जाल्यार दुबाविताचे हेर दोग वांगडी हे अजून पुलिसांच्या हाताक सांपडिल्ले नात. दुबावीत गोंयांत आसात काय गोंया भायर वचपाक ते येसस्वी थारले हाची पडटाळणी पुलीस करतात.