भांगरभूंय | प्रतिनिधी
कळंगूट शार नाका जाल्ल्या पर्यटकांक लागून कळंगूट शार बरेंच बदनाम जालां. हेर तालुक्यांतल्या गोंयकारांक खबर आसच्यो नात, तसल्यो गजाली कळंगूटकारांक कळ्ळ्या आसतल्यो, देखून पंचायतीन आतां कडक धोरण चालीक लावपाचें थारायलां. मात, सरकारी यंत्रणे कडल्यान तांकां पालव मेळपाक जाय. नाजाल्यार कितल्योय बऱ्यो येवजण्यो, कल्पना चालीक लावन कांयच फायदो ना. कळंगूट शारांत, दर्यावेळेर येवपी पर्यटकां कडल्यान कर वसूल करपाची येवजण आसा. पांच जाग्यांचेर ते खातीर चेकपोस्ट उबारतले. भितर येवपाक घडये पास घेवचो पडटलो. तांच्या गाडयांची तपासणीय करपाक मेळटली. अर्थांत ते खातीर पंचायतीक खास कर्मचारी नेमचे पडटले. ते विशींचो प्रस्ताव पंचायतीन उत्तर गोंय जिल्होधिकाऱ्यां कडेन मान्यताये खातीर धाडला. महाबळेश्वरांत (महाराष्ट्र) तसो पर्यटकां कडल्यान कर घेतात. कळंगूट पंचायतीचो हो प्रस्ताव पंचायत राज कायद्या खाला आसा. म्हणटकच तो सरकाराक मानून घेवपाक हरकत नासची. शारांत उक्त्याचेर जेवण करप, सोरो पियेवन उपद्रव करप, बाटल्यो, उश्टें, कोयर मेळत थंय उडोवप, गाडयो मेळत थंय उब्यो करप असलेय प्रकार पर्यटक करतात. ताचेरूय आतां नियंत्रण दवरपाचें पंचायतीन थारायलां. असल्या बेशिस्त पर्यटकां कडल्यान पंचायत कर घेतली. ताका दंडूय म्हणूं येता. हो प्रस्तावूय जिल्होधिकाऱ्यांक धाडला. जर कळंगूट पंचायतीन उबारिल्लीं हीं पावलां येशस्वी थारलीं, जाल्यार हेर पंचायतींनीय तशेच निर्णय चालीक लावपाक कोणाची हरकत नासची. कारण कसलेय बेकायदो, बेशिस्त, मनमानी गजालीचेर चाबूक हो बसपाकूच जाय. आव जाव घर तुम्हारा, ही वृत्ती आतां पुरो जाली.
पर्यटक स्वताची गाडी घेवन येतात, उक्त्यार स्वताच रांदतात, गाडयेंतूच न्हिदतात…. हाचे फाटल्यान कारणां आसात. तीं सोदून पयस करपाचो यत्न जावंक जाय. गोंयांत म्हारगाय मळबाक तेंकल्या. 20 रुपयांची उदकाची बाटली 40 रुपयांक मेळ्ळी जाल्यार पर्यटक घरचेंच उदक कित्याक हाडचो ना? जेवण, रावपूय थोड्यांक परवडना आसतलें, म्हूण ते अशे वागतात. तें कितेंय आसलें तरी उक्त्याचेर रांदप, उश्टें थंयच उडोवप, सोरो पियेवन झगडीं, बोवाळ करप, सैमीक विधी करप…. चुकीचें. प्रत्येक राज्याची शिस्त आसता, थंयचे कांय नेम आसतात, ते पाळपाक जाय. दरेका राज्यांतील लोकांची मानसीकताय वेगळीवेगळी आसता. आमकां जाय म्हूण आमी खंयूय वचून मनाक येता तशें वागूंक शकनात. दुसऱ्या देशांनी वचप्यांक हाचो अणभव चांटये पावलाक आयला आसतलो. कळंगूटकारांक हें सदांच भोगचें पडटा. तातूंत गुन्यांवकारी, बेकायदेशीर वेवसायूय वाडल्यात. फाटीं ब्रह्मेशानंद स्वामींनी कळंगूट आपणाक थायलॅण्ड कशें दिसलें, अशी प्रतिक्रिया उक्तायिल्ली. तेन्ना व्हडलो बोवाळ आनी जागृतायूय जाल्ली. कळंगूट पंचायतीन हीं पावलां उखल्ल्यांत तीं घडये हे खातिरूय आसत. मात, ह्या कामाक तांणी पुलिसांची मजत घेवपाचें थारायलां. तांकां दंड घालतकच चूक आसल्यार कारवायूय जावंक जाय. थोडे पर्यटक दीसभर भौशीक स्वच्छताघरांचो वापर करतात, मेळत थंय सोऱ्याच्यो बाटल्यो उडयतात, अशेंय पंचायतीक दिसलां. सगले गैरप्रकार बंद जातले, तसो संदेश हेर राज्यांनी वतलो, हे खातीर पयलीं पंचायतीन यत्न करूंक फावो. थळाव्या लोकांचेंय ते खातीर सहकार्य जाय पडटलें.
पर्यटकांचेर नियंत्रण दवरपाक उपाय घेतले, पूण गोंयकारांचें कितें? थंय जे गैरप्रकार चल्ल्यात, तातूंत 100 टक्के भायलेच लोक आसतात? सगलीं वायट, बेकायदेशीर कामां भायलेच करतात? हाचेरूय पंचायतीक आनी हेर जापसालदार नागरिकांक शांत चित्तान विचार करचो पडटलो. जर आमचीच वंय कोसमेल्या जाल्यार भायल्यांनी शेत खालें, म्हणपाचो आमकां अधिकार ना. पर्यटकांच्या उपद्रवा वांगडाच कळंगूट गुन्यांवमुक्त, बेकायदेशीर गजालीं पसून मेकळें जावंक जाय. पंचायत आनी सरकारी यंत्रणेन यत्न केल्यार हें अशक्य न्हय. खंडणी बहाद्दर, घुंवळे वखदां पसून पुराय दर्यादेग वाठार नितळ जावंक जाय. पर्यटनाच्या मोसमांत बाचाबाची, मारामारी जाता ती बंद जावची. रातच्या वेळार आवाजाचें प्रदुशण जाता, ताचेरुय नियंत्रण जाय. ताण, तणाव, गोडेंमूत हे भलायकेचे दुस्मान तशेंच आवाजाचें, हवेचें प्रदुशण हें पसून भलायकेक सामकें वायट. आवाजाचो त्रास, मनस्ताप सोंसला, सोंसतात तांकां हें आमी सांगपाची गरज ना. पुलीस यंत्रणेन हें मनार घेवचें. हें सगलें करतना पर्यटक दुखावचे नात, हें पळोवचें पडटलें. कारण गोंयांत येतात ते चडशे पर्यटक मजा करपाक येतात….. आनी आमची तिजोरी पर्यटकांचेरूच अवलंबून आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
