भांगरभूंय | प्रतिनिधी
म्हापशें: कळंगूट पंचायतीचे सचीव अर्जून वेळीप हांची सरकाराक तडकाफडकी बदली केल्या. छत्रपती शिवाजी महाराजांच्या पुतळ्या वयल्यान मंगळारा 20 जूनाक शिवमोगींचया आंदोलना दिसाच वेळीप हांचे बदलेचो आदेश जारी केल्लो.
वेळीप हांची बदली करून ह्या पंचायतीच्या सचिवपदाचो अतिरिक्त ताबो कांदोळीचे पंचायत सचीव भारत गांवस हांचे कडेन दिला. वेळीप हे सोमारा आपल्या नव्या पदाचो ताबो घेतले.
20 जूनाक जाल्ल्या आंदोलनाच्या कारणा वयल्यानूच सचीव वेळीप हांची सरकारान ही तडकाफडकी बदली केल्ल्याची चर्चा कळंगूटे चल्ल्या.
मजगतीं, नायकावाड्यार कळंगूट पुलीस स्टेशना लागसार चोघम रस्त्या वयल्या जंक्शनाचेर शिवस्वराज्य कळंगूट हे संस्थेन छत्रपती शिवरायांचो राती भितर पुतळो उबारिल्लो. सोमारा 19 जूनाक कळंगूट पंचायतीन हो पुतळो काडपाचें आदेशपत्र ते संस्थेक दिल्लो. हे आदेशपत्राचे फाटभुंयेर 20 जूनाक गोंयभरांतल्या शिवमोग्यांनी शिवराज्य कळंगूट संस्थेच्या फुडारपणा खाला पंचायत घराचेर मोर्चो आंदोलन केल्लें. हें आंदोलन स वरां चलिल्लें. पंचायतीच्या मालमत्तेची ह्या वेळार शिवमोगींनी मोडतोड केल्ली. ते उपरांत सरपंच जोजफ सिक्वेरा हांणी तें आदेशपत्र फाटीं घेवन शिवमोगींची जाहीर मागी मागिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
