भांगरभूंय | प्रतिनिधी
म्हापशेंः कळंगूट दर्यादेगेर टी. सपुलौ (19) ह्या मणिपूरच्या तरणाट्याक बुडून मरण आयलें. तो आपल्या हॉटेल कर्मचाऱ्यां वांगडा दर्यादेगेर भोंवपाक गेल्लो. सोमारा, 4 तारखेर सकाळीं 6.20 वरांच्या सुमाराक ही घडणूक घडली.
कळंगुटांतल्या गौरावाडोच्या किंग चिली हॉटेलांतल्या चार कर्मचाऱ्यांचो पंगड कांदोळे सीम लागसारच्या कळंगूट दर्यादेगेर गेल्लो. तातूंत नागालँडांतले दोग, मिझोरामांतले एक आनी मणिपूरचो मयत तरणाटो टी. सपुलौ हांचो आसपाव आसा. देगेर पावतकच मयत सपुलौ हाका पेंवपाची उमळशीक लागली आनी सहकाऱ्यांचो विरोध आसून लेगीत तो उदकांत देंवलो.
दर्यांच्या उदकांत न्हांतना व्हडली ल्हार आयली आनी ते वांगडा तो भितर गेलो. तो उदकांत गायब जाल्लो पळोवन ताच्या वांगड्यांनी आपल्या हॉटेल मॅनेजराक खबर दिली. तो रोखडोच घडणुकेच्या थळार पावलो. सुमार अर्द वरां उपरांत सपुलौ दर्याच्या उदकांत उफोताना दिसलो. ताच्या इश्टांनी ताका उदकांतल्यान भायर काडलो आनी एम्ब्युलन्सांतल्यान कांदोळे प्राथमीक भलायकी केंद्रांत व्हेलो. थंय दोतोरांनी ताका मरण आयिल्ल्याचें सांगलें.
घडणुकेची म्हायती मेळ्ळे उपरांत लायफगार्ड, पर्यटन पुलीस आनी कळंगूट पुलिसांनी त्या सुवातेर भेट दिवन तपासणी केली. कळंगूट पुलीस निरिक्षक स्नेहल मळीक हांणी पंचनामो करून कूड पोस्टमॉर्टमा खातीर जीएमसींत धाडली. पुलिसांनी मयताच्या कुटुंबा कडेन संपर्क केला.
मजगतीं, मयत टी. सपुलौ हो एक म्हयन्या सावन गौरावाडो, कळंगुटेच्या किंग चिली हॉटेलांत काम करतालो. ताचे आदीं तो पर्वरीटांतल्या एका हॉटेलांत काम करतालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
