भांगरभूंय | प्रतिनिधी
कळंगुट, कांदोळे, बागा पट्ट्यांत फाटल्या कांय दिसांनी घडिल्ल्या घडणुकांक लागून सगलेच अस्वस्थ जाल्यात. नाका जाल्ल्यो घडणुको जाल्यात, तातूंत व्हडलेंशें अजाप ना. कारण दर्या वेळांचेर त्यो घडटातूच. तांच्यो खबरो दिसाळ्यांनी येनात. मात, कोणे मोबायल फोनाचेर रेकाॅर्डिंग केलें आनी तें सोशल मिडियाचेर घालें जाल्यार ती खबर जंय गोंयकार रावतात, त्या- त्या जाग्यांचेर पावता. म्हणल्यार संवसारभर!!…. आनी उणेच 100 जाण ती शॅर करून व्हायरल करतात. हाचो सगल्यांत व्हडलो धपको बसता तो आमच्या गोंय राज्याक. कारण तें पर्यटन राज्य. आतां लागीं- लागीं देशभरांत गोंयच्यो दर्यादेगो सुरक्षीत उरूंक नात, असो संदेश पावला आसतलो. गोंयांत पर्यटक म्हूण कुटुंबां कितलीं येतात आनी सोरो पियेवपाक, ड्रग्स घेवपाक वा ‘मसाज’ घेवपाक कितले जाण येतात, हाचो अभ्यास केल्यार आमचें पर्यटन नेमकें खंयचे दिशेन चल्लां ताचो अदमास येतलो. कालूच पशुवैजकी अधिकाऱ्यांक मारपेट, चलयेचो विनयभंग आनी क्लब डावनटावनांत जाल्लो बोवाळ हीं प्रकरणां सारकीं हाताळूंक नाशिल्ल्याचें कारण दिवन दोन वरिश्ठ पुलिसांची बदली केल्या. म्हणटकच आतां वयल्या पर्यटन पट्ट्यांतलीं धुमशेणां बंद जातलीं असो घेवपाचो?
गुन्यांवकारी घडणुको घडल्यो काय दर्यादेगां वयल्या गांवांनी जे रावतात, ते कारण नासतना बदनाम जातात. तांकां जिवाक भियेत दीस काडचे पडटात. कांय वर्सां पयलीं नायजेरीयन नागरिकांक लागून सांजवेळा साता उपरांत चलयांक रस्त्याचेर भोवप कठीण जालां, अशी प्रतिक्रिया आयिल्ली. पयरुय कळंगुटच्या थळाव्या तरणाट्याचो एक व्हिडीयो व्हायरल जाला. ताणेंय तेंच सांगलां. मात ह्या वेळार हांगा स्थायीक जाल्ले गोंया भायले लोक हें करतात, अशें ताणें म्हणलें. ते बेकायदेशीर घरां बांदून रावल्यात. तांची दादागिरी बंद जाली ना आनी आमी गोंयकार चाळवले जाल्यार कितें करीत ताचो नेम ना, अशेंय ताणें म्हणलें. ताणें एकल्याचें नांवूय घेतलें. हे दादागिरी करपी तरणाटे एके कडेन बसून आसतात. फट दिसता जाल्यार वचून पळोवचें, अशेंय ताणें सांगलें. तो सांगता तें खरें आसत जाल्यार ह्या मस्ती करपी तरणाट्यांची दादागिरी कोणाच्या आशिर्वादान चलता? तांचे कडेन पुलीस आडनदर करतात काय? हय जाल्यार कित्याक? ते तरणाटे पोट भरपाक नेमकें कितें करतात? ताचो सोद आतां सरकारी यंत्रणेंतल्या वरिश्ठांनी घेवचो. हांगा भायले- भितरले संघर्श पेटलो जाल्यार मागीर तो गोंयभर पावतलो. ताचे पयलीं सरकाराक पावलां उबारचीं पडटलीं.
बागांतल्या एका क्लबांत कांय कारणां वयल्यान कर्मचारी आनी पर्यटकां मदीं पेटलें. झगडीं सोडोवपाक गेल्ल्यांक मार पडलो. हाचो व्हिडीयो सगल्याक भोंवता. तातूंत तरसादी, दांडे घेवन कांय जाण दिसतात. पुलिसांक ते कशे सांपडनात? पिवपाक, ड्रग्स, मसाज घेवपाक येतात, तातूंतल्या भोवतेक पर्यटकांची प्रवृत्ती आक्रमक आसता. थंयच्या कांय हाॅटेलांतले थोडे कर्मचारीय मदेल्यात. थंय बावन्सरुय आसतात. म्हणटकच सादी चूक जाल्यार पसून कांय वेळान थंय दांडे, तरसादींची लढाय सुरू जाता. आतां पुलिसांनी त्या क्लबाक कुलूप लायलां. क्लब बंद करून जावचें ना. ह्यो वृत्ती, प्रवृत्तीच चेंचावन काडच्यो पडटल्यो. करोडांनी पर्यटक देशभर भोंवतात. कोणे केन्ना पर्यटक आनी थळाव्यां मदीं मारामारी जाल्ली आयकल्या? मागीर हें गोंयांतूच कित्याक? सोरो, ड्रग्स आतां सगले कडेनूच मेळटात.
कळंगुटांतल्या पोरबावाड्यार एके चलयेचो हात धरिल्ल्यान पर्यटक, ती चली, तिच्या वांगडा आशिल्ल्या तरणाट्यां मदीं शाब्दीक बाचाबाची जाली. तेन्ना पर्यटकांनी तरणाट्यांक मारले. थळावे लोक एकठांय जाल्ल्यान प्रकरण तितल्यारुच सोंपले. पर्यटक गोंयच्या चलयां विशीं कितें चित्र मनांत पितारुन येतात, ताची हे घडणुके वयल्यान कल्पना करूं येता. तिसरी घडणूक पशुवैजकी अधिकाऱ्यांची. हे दोतोर. तातूंत एक चलीय आसा. दोतोर, वकील, अभियंते ह्या पदांक एक रेस्पेद आसा. अर्थांत सगलेच त्या पदांक फावोशे वागनात ती गजाल वेगळी. शॅक्स धनयान आमकां बडयले अशी कागाळ तांणी केल्या. थळाव्यांच्या मतान, एक दोतोर चली रस्त्यार बसून व्हडल्या- व्हडल्यान कितें तरी म्हणटा. ताचो व्हिडीयो आयला. ह्यो दोतोरांनी थळाव्या वांगडा वाद घालो, वंय मोडली. मागीर कांय जाणांनी तांकां मारपेट केली खंय. खरें- फट, चूक कोणाची ते पुलिसांनी बेगीन सोदून काडपाक जाय.
दर्यावेळांचेर वेसनां आशिल्ल्यांचीं भिरीं येवपाक लागल्यांत. तांकां जाय ताची पुरवण करपाक गुन्यांवकारुय थंय पासय मारपाक लागल्यात. हें अशेंच चालू उरलें जाल्यार कळंगूट, कांदोळे, बागा पट्ट्याचें खरेंच थायलॅण्ड जावपाक वेळ लागचो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
