भांगरभूंय | प्रतिनिधी
म्हापशें ः कळंगुटे भौशीक सुवातेर सोरो पियेवपी २१ जाणांचेर पुलिसांनी गुन्यांव नोंद केलो. ह्या दुबावितां कडल्यान वट्ट ४२ हजार रूपया दंडात्मक रक्कम वसूल केली.
अंदूं कळंगूटे पुलिसांनी भौशीक सुवातांचेर सोरो पियेवप्यां आड मोहीम राबोवन ही कारवाय केली. पर्यटक सोरो पियेवन दर्यादेगांचेर सोर्याच्यो बोटल्यो उडयतात. ह्यो फुटिल्ल्यो बाटल्यो पियेवन जायते जाण जखमी जाल्यात. तशेंच सोरो पियेवन दर्यांत देंविल्ल्यान कांय जाणांक बुडून मरण आयिल्ल्याच्यो घडणुकोय घडल्यात. हाका लागून भौशीक सुवातांचेर सोरो पियेवपी लोकां आड पुलीस निरीक्षक परेश नायक हांच्या मार्गदर्शनाखाला पुलिसांनी ही विशेश मोहीम राबयल्या.
कळंगूटे पुलीस स्टेशनांत १ जानेवारी ते ६ फेब्रुवारी ह्या ३७ दिसांच्या काळांत वट्ट २१ जाणां आड गुन्यांव नोंद केले. दरेकी २ हजार रूपयां प्रमाण संबंदीतां कडल्यान बेचाळीस हजार रूपया वसूल केले. पर्यटकांचे सुरक्षिततायेची खात्री करपा वांगडा दर्यादेगेर नितळसाण दवरून पर्यटकांक सुरक्षीत तशेंच अधीक सुखदीणें वातावरण निर्माण करप, हो हे मोहिमे फाटलो हेतू आशिल्ल्याची म्हायती पुलीस निरीक्षक परेश नायक हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
