भांगरभूंय | प्रतिनिधी
पणजी : कळंगूटे आयतारा रातीं घडिल्ल्या टॅटू वेवसायांतल्या वादांतल्यान जाल्ल्या सुरी हल्ल्या प्रकरणांत पुलिसांनी एका दुबाविताक अटक केली. ह्या हल्ल्यांत अरुण लमाणी (रा. कर्नाटक) गंभीर जखमी जाला. मुखेल आरोपी आकाश लमाणी आजूनय फरारी आसा.
हे विशीं पुलिसांनी दिल्ले म्हायती प्रमाण, ह्या प्रकरणांत प्रकरणांत अरुण शंकर पवार (२६, रा. कोलवा, मूळ गदग, कर्नाटक) हाका अटक केल्या. ताणे मुखेल दुबावीत आकाश लमाणीक पळून वचपाक मजत केल्ल्याचें तपासा वेळा कळ्ळां. पुलिसांनी ताका आयज, मंगळार १५ जुलयाक मध्यान रातीं सुमार १२.४५ वरांचेर अटक केली.
नेमकें प्रकरण कितें?
शेनवारा रातच्या सुमार १.३० वरांचेर खोबरावाडो-कळंगुटेचे जे जे बेकरे लागसारा सुरी हल्ल्याची घडणूक घडली. तपासा वेळार मुखार आयिल्ले म्हायती प्रमाण, अरुणान आकाश आनी ताचो वांगडी पर्शा हांचे वांगडा टॅटू वेवसाय सोडून हेर दुकानांत काम करपाक सुरू केल्लें. आदल्या अर्थीक वेव्हारा विशीं उलोवपा खातीर आकाशान अरुणाक मेळपाक आपयिल्लो. थंय परत सुरू जाल्ल्या झगड्यान तिडकीन आकाशान अरुणाचेर सुर्यान हल्लो केलो. तांणी ताच्या तोंडार आनी पोटार वार केले. ह्या वेळार गंभीर जखमी जाल्ल्या अरुणाक रोखडोच गोमेकॉत दाखल केलो. ताचेर सध्या उपचार सुरू आसात.
ह्या प्रकरणांत अटक केल्ल्या अरुण पवार हाचेर भारतीय न्याय संहिता २०२३ खाला कलम १०९(२) आनी २४९ प्रमाण गुन्यांव नोंद केला. पुलीस निरीक्षक तुषार लोटलीकार हांच्या नेतृत्वा खाला फुडलो तपास पुलीस करतात. मुखेल आरोपी आकाश लमाणीचो पुलीस सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
