भांगरभूंय | प्रतिनिधी
मायकल लोबोः हेर गांवांतूय आयोजन करपाक तेंको
भांगरभूंय । प्रतिनिधी
पणजीः सनबर्न आयोजकां मुखार गोंयांत नेमकी हो महोत्सव खंय आयोजीत करचो हो प्रस्न उबो रावला. हालींच पंचायत मंत्री मॉवीन गुदिन्हो, आमदार आंतोन वाझ आनी रेजिनाल्ड हांणी मुख्यमंत्र्यांची भेट घेवन, दक्षीणेक सनबर्नाक परवानगी न्हयकारची, अशी मागणी केल्ली. तेन्ना मुख्यमंत्र्यानीय ही मागणी मान्य करून, दक्षीणेंत सनबर्न जावचो ना अशें म्हणलां.
मजगतीं, बार्देस म्हालांतल्या कामुर्ले गांवांत अंदूं सनबर्न जातलो अशी चर्चा रंगिल्ली. मजगतीं तांणीय तिडक उक्तायिल्ल्यान तीय शक्यताय सोंपली. मात आतां कळंगूटेचे आमदार मायकल लोबो हांणी अंदूं सनबर्न महोत्सव कळंगूटे आयोजीत करपाक कसलीच हरकत ना, अशें विधान केलां.
गोंयांत आमचो मतदारसंघ सोडल्यार सनबर्न महोत्सवाक कोणूच सुवात दिवपाक तयार ना. सनबर्न आदीं कांदोळे जातालो. उपरांत तो वागातोरूय आयोजीत केलो. ह्यो दोनूय सुवातो बर्यो आसात. आतां दक्षीणेच्या लोकांक तांच्या गांवांत सनबर्न नाकाच. तरीय थंयच ह्या महोत्सवाचें आयोजन केल्यार लाखांनी लोक रस्त्याचेर देंवतले. गोंया खातीर ही लजेची गजाल. गोंयच्या हेर गांवांनी सनबर्न महोत्सव आयोजीत करपाची तयारी दाखयल्यार ताकाय तेंको आसतलो, अशें लोबो हांणी सांगलें.
मजगतीं, सनबर्न महोत्सव हो सदांचो वादाचो विशय थारला. ह्या महोत्सवांत व्हडा प्रमाणांत घुंवळे वखदांचो वापर जाता. ओव्हरडोसाक लागून खूबश्या जाणांक मरण आयिल्ल्याच्योय घडणुको थंय घडल्यात. देशाचे तरणे पिळगेक वायट मार्गार व्हरपी ह्या सनबर्न महोत्सवाक परवानगी नाकाच, अशें म्हणीत दक्षीणेंतल्या खूबश्या ग्रामसभांनी हाचे आड थाराव मंजूर करून ते मुख्यमंत्र्यांक धाडिल्ले. मजगतीं, सोमारा पर्वरे मंत्रालयांत जाल्ले बसके उपरांत पत्रकारांनी हे विशीं पर्यटन मंत्री रोहन खंवटे हांकां हांकां विचारलें तेन्ना तांणी सांगलें, आयोजकांनी सुवात सोदून योग्य प्रस्ताव सादर केल्यार सनबर्न महोत्सवाक निश्चितूच परवानगी मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
