भांगरभूंय | प्रतिनिधी
बीडीओ आनी पंचायत संचालका कडेन थळाव्यांची हस्तक्षेपाची मागणी
भांगरभूंय । प्रतिनिधी
म्हापशें: आगरवाडो, कळंगूटेच्या सकयल्या वाठारांतली शेत जमीन मातयेचो भराव घालून बेकायदो रस्त्याचें काम चल्लां, तें तत्काळ बंद करचें आनी फुडलो विध्वंस आडावपा खातीर हस्तक्षेप करचो, अशी मागणी तशेंच कागाळ निवेदना वरवीं थळावे विनीत दिवकार हांणी बार्देस गटविकास अधिकारी आनी पंचायत संचालका कडेन केल्या. हे कागाळेची प्रत दिवकार हांणी कळंगूट सरपंच, उपजिल्होधिकारी, उपनगर नियोजक आनी उत्तर गोंय कोमुनिदाद प्रशासक हांकां धाडल्या.
आगरवाड्यार सर्वे नं. 344/1,2,3,4,5,6,7, 343/1,2,3 आनी 346/1 हे जमनीर दोग बिगर गोंयकार बेकायदो मातयेचो भराव घालून थंय रस्तो बांदतात. ही शेत जमीन. ती कळंगूट कोमुनिदाद आनी कुळांचे मालकीची. सरकारी अधिकाऱ्यांची कसलीच परवानगी घेनासतना नवो रस्तो बांदचे खातीर ही जमीन मातयेचो भराव घालून जमनीचें सपाटीकरण चल्लां. तशेंच ह्या सकयल्या वाठारांत हॉटेलाचें काम सोंपे जावचे, हे खातीर हो बेकायदो प्रकार चल्ला. ते खातीर तांणी शेत जमनीर अतिक्रमण केलां, अशें निवेदनांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
