भांगरभूंय | प्रतिनिधी
-शॅक धनया सयत चवगांक अटकम्हापशेंः कळंगूट दर्यादेगेवेल्या मरिना बीच शॅकात रातच्या वेळार जेवणा खातीर आयिल्ल्या आंध्रप्रदेशाच्या पर्यटक गटाक जेवणा वयल्यान शॅक धनी आनी कामगारांनी केल्ले मारपेटींत एका पर्यटकाक मरण येवपाची घडणूक घडली. हांतूत भोला रवी तेजा (28, आंध्र प्रदेश) ह्या पर्यटकाक मरण आयलें. ह्या खून प्रकरणांत मरिना बीच शॅकाचो धनी आग्नेल सिल्वेरा (64) हाचे सयत ताचो पूत शुबर्ट सिल्वेरा (23), कर्मचारी अनिल बिस्ता (24, नेपाळ) आनी कमल सुनार (23, नेपाळ) हांकां पुलिसांनी अटक केल्या. ही खूनाची घडणूक मंगळारा मध्यानरातीं 1 ते 2 वरां मजगतीं घडली.
मेळिल्ले म्हायती प्रमाण, भोला रवी तेजा आनी ताचे इश्ट मेळून चार- पांच जाणांचो पंगड कळंगुटेंतल्या मरिना बीच शॅकांत जेवणा खातीर गेल्ले. ह्या पर्यटकांक आनीक थोडें जेवण जाय आशिल्लें. पूण शॅकाच्या कर्मचाऱ्यांनी रांदची कूड बंद जाली, अशें सांगलें. हाका लागून पर्यटक पंगड आनी शॅकाच्या कर्मचाऱ्यां मदीं वाद जालो आनी हें प्रकरण मारपेटाचेर पावलें.
पुलिसांनी दिल्ले म्हायती प्रमाण, शॅकाचे कर्मचारी आनी धनी हांणी पर्यटकांक दांड्यान मारपाक सुरवात केली. मरण आयिल्ल्या भोला रवी हाचे तकलेर नेटान दांडो बशिल्ल्यान तो गंभीर जखमी जालो. उपरांत सगल्या जखमींक कांदोळेच्या भलायकी केंद्रांत उपचारा खातीर व्हेले. तेन्ना भोला रवी हाका मरण आयिल्ल्याचें दोतोरांनी सांगलें.
घडणुकेची म्हायती मेळ्ळे उपरांत कळंगूट पुलीस निरिक्षक परेश नायक हांणी वांगड्या सयत घडणूक सुवातेर धांव घेतली आनी पंचनामो केलो. पुलीस उपअधीक्षक विश्वेश कर्पे आनी अधीक्षक अक्षत कौशल हांणी घडणूक सुवातेक भेट दिवन पळोवणी केली.
पुलिसांनी खूनाच्या आरोपा खाला गुन्यांव नोंद केला.
पुलिसांच्या सुचोवण्यां कडेन आडनदर…
पर्यटकांक कोणेंच हात लावचो न्हय वा तांकां मारपेट करची न्हय. पर्यटक मस्ती करतात जाल्यार तांकां समजावपाचो यत्न करचो आनी रोखडेच पुलिसांक आपोवचे. अशीं सुचोवणी खुबश्या वेळार पुलिसांनी शॅक, रेस्टॉरंट आनी हॉटेल ननयांक दिल्या. पूण तरी लेगीत दर्यादेगेवेल्या वाठारांनी पर्यटकांक मारपेट करपाचे प्रकार घडटात. ह्या खूनांतल्यानूय तेंच स्पश्ट जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
