भांगरभूंय | प्रतिनिधी
म्हापश्यां : नायकावाडो कळंगुटेच्या केजीएन बिर्याणीवालो रेस्टॉरन्टांतले जेवणाचे पयशे दिनासतना रेस्टॉरन्टच्या कामगाराक मारपेट, मालमत्ता वाट लावपाच्या आनी खंडणीची मागणी केल्ल्याच्या आरोपा खाला पुलिसांनी दोगां दुबावितांक अटक केल्या. अभिषेक अशोक सुतार (रा. आल्तो तोर्डा, साल्वादोर द मुंद, पर्वरी) आनी दीपक कुमार सिंग (रा. अवतचितवाडा वेर्ला काणका आनी मूळ गोरखपूर उत्तरप्रदेश) अशीं दुबावितांचीं नांवां. ही घडणूक आयतारा ८ तारखेर ६.३० वरांचेर घडली. ह्या प्रकरणांत रेस्टॉरन्टचे कामगार मैनुद्दीन अन्सारी हांणी कळंगुटे पुलिशेंत कागाळ नोंद केल्या.
दोगूय दुबावीत आरोपी वयल्या रेस्टॉरंटांत आयले. ते जीए ०३ एएक्स ३७४५ नंबराचे स्कुटरीचेर आयिल्ले. दुबावितांनी रेस्टॉरन्टांत जेवण जेवले उपरांत पयशे दिवपाक न्हयकार दिलो. तशेंच कागाळदार अन्सारी हांच्या तोंडार मुठी मारून मारपेट केली. उपरांत तांकां धमकावन रेस्टॉरन्टच्या कावंटरांत आशिल्ले पयशे दिवपाक सांगलें.
ह्या प्रकरणांत पुलिसांनी दुबाविता आड भा.न्या.सं.च्या ११५(२), ३२४(४), ३०८(४) आनी ३(५) कलमान्वये गुन्यांव दाखल केला. पुलिसांनी मंगळारा रातीं अभिषेक हाका अटक केली, जाल्यार बुधवारा सकाळीं दीपक कुमार हाका अटक केली. फुडलो तपास पुलीस निरीक्षक परेश नायक हांच्या मार्गदर्शनाखाला पुलीस करतात.
मजगतीं, मंगळारा १० तारखेर हे घडणुकेची सीसीटीव्ही फुटेज व्हिडिओ कॉंग्रेस प्रदेशाध्यक्ष अमित पाटकार हांणी सोशल मिडीयाचेर उपलोड करून दुबावितांक बेगोबेग अटक करपाची मागणी केल्ली. तशेंच राज्यांतलो कायदो आनी सुवेवस्था, सुरक्षीत पर्यटनाचेर तांणी प्रस्न केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
