कळंगूटे फिल्मी स्टायलीचो थरार

भांगरभूंय | प्रतिनिधी

• गाडी मारिल्ल्यान पुलीस हवालदार गंभीर जखमी

• खुनी हल्ल्याच्या आरोपा खाला दोगांक अटक

भांगरभूंय । प्रतिनिधी

म्हापशें: फिल्मी स्टायलीन पुलिसाचेर गाडी घालून पळून वचपी दुबावितांक कळंगूट पुलिसांनी अटक केली. ह्या जिवघेण्या हल्ल्यांत पुलीस हवालदार विद्यानंद आमोणकार गंभीर जखमी जाला. तांचेर गोमॅकाँत उपचार चालू आसात.

ह्या प्रकरणांत दुबावीत संदीपकुमार राधाकृष्म एम. (26, रा. बंगळुरू आनी मूळ थांग्गूपर्थी, आंध्रप्रदेश) आनी वसंत देवेंद्र मडिवाल (32, रा. मजाली कारवार) ह्या दोगांक अटक केल्या.

चित्रपटांतल्या एका थराराक दृश्या प्रमाण ही घडणूक शुक्रारा रातच्या 11.30 वरांच्या सुमाराक गौरावाडो कळंगूटे मेरिएय हॉटेला लागसार घडली. कळंगूटे दोग जाण गुन्यांवकारी कारवायो करपाक आयल्यात, अशी म्हायती पुलिशेक मेळ्ळी. ते प्रमाण पुलीस पंगड गौरावाड्यार दुबावितांक धरपा खातीर गेल्ले. थंय वयले दुबावीत केए 04 एनबी 8391 नंबराची टाटा टियागो मोटारींत आशिल्ले. पुलीस आपल्या मागार आसा, ते आपली चवकशी करतात हाची सुरू तांकां लागली. पुलीस हवालदार विद्यानंद आमोणकार आनी ताचो सांगाती पुलीस ते मोटारी कडेन येताच दुबावीत वसंत मडिवाल हाणें मोटारीचें दार उक्तें करून थंयच्यान पळून गेलो. ताका धरचे खातीर पुलिसांनी ताचो फाटलाव केलो जाल्यार पुलीस हवालदार विद्यानंद आमोणकार मोटार चालक दुबावीत संदीपकुमार एम. हाका धरपाचे तयारेंत आशिल्ले. त्याच वेळार दुबावितान मोटार सुरू केली आनी रिव्हर्सांत घेवन आमोणकार हांचेर धपको मारलो.

मोटारीचो धपको बसताच हवालादर आमोणकार मोटारी पोंदा पडले आनी मोटारीक शिरकले. तांकां तेच स्थितींत दुबावितान फरफटीत ओडीत सुमार 100 मिटर मेरेन व्हेलो. मोटारीक शिरकल्ले हवालदार आमोणकार सुटले उपरांत दुबावितान मोटार धोफरायत थंयच्यान पळून गेलो.

हे घडणुकेंत हवालदार आमोणकार गंभीर जखमी जाले. ताचे तकलेक आनी कमरेक गंभीर जखम जाली. ताकतिकेन तांकां सांगाती पुलिसांनी गोमॅकाँत दाखल केले. थंय तांचेर उपचार चालू आसात.

मजगतीं, पुलिसांनी फाटलाव करून दुबावीत वसंत मडिवाल हाका धरलो. तशेंच मोटारी सयत पळून गेल्ल्या दुबाविता संबंदांत गोंयांतल्या सगळ्या पुलिसांक कळंगूट पुलिशेन सतर्क केले.

अनमोड घांट मार्गान बंगळुरू पळून वचपी दुबाविताक फोंडें पुलिशेच्या रॉबर्ट जिपी वयल्या कर्मचाऱ्यांनी धरलो आनी ताका ताब्यांत घेवन कळंगूट पुलिशेचे सुवादीन दिलो. पुलीस कॉन्स्टेबल अमीर गरड हांचे कागाळेच्या आदारान पुलिसांनी दुबाविता आड खुनी हल्ल्याचो गुन्यांव दाखल करून ताका अटक केली. फुडलो तपास पुलीस निरिक्षक परेश नायक हांच्या मार्गदर्शना खाला उपनिरिक्षक राजाराम बागकार करतात.