भांगरभूंय | प्रतिनिधी
म्हापशें, प्रतिनिधी ः राज्यांत सगळे कडेन वेगवेगळे बेकायदेशीर वेवसाय चलतात. थळावे पंचायतीन आयज कळंगूटे दर्यादेगेर बेकायदेशीर रितीन चलपी दुकानांचेर धाड घाली. जायत्या दुकानदारां कडेन योग्य परवाने नात. उल्लेख केल्ली सुवात मेळयतना हे परकी वेवसायीक कपडे विकपाचे परवाने घेतात, पूण कांय काळा उपरांत त्या सुवातेर टॅटूचे दुकान दिसता. तांकां होच वेवसाय करपाचो आसल्यार तांणी योग्य परवानो घेवन वेवसाय करचो अशें सरपंच जोसेफ सिक्वेरा हांणी सांगलें.
आयज थळावे पंचायतीन बेकायदेशीर वेवसाय करपी सुमार पांच दुकानां बंद केल्यांत. तशेंच दुकानां मुखार आशिल्ली बेकायदेशीर बांदकामाय काडून उडयल्यात. येत्या सोमारा संबंदीत धनयांक पंचायत कार्यालयांत आपयल्यात अशें सिक्वेरा हांणी सांगलें.
कळंगूट – बागा दर्यादेगेर आनी टिटोच्या गल्लींत दुकानां उबारपी अनधिकृत विक्रेत्यां आड हांचे फुडें कारवाय जातली अशें सिक्वेरा हांणी स्पश्ट केलें. तशेंच आमदार आर्लेकार हांचो ह्या आस्थापनां कडेन संबंद आशिल्ल्याचो अधिकृत नोंद ना अशें तांणी सांगलें.
दर्यादेगेर टावट्स तशेंच बिर्यानी, काजुगर सारकिल्ले अन्न विकपी लोकांचो आंकडो वाडला. ताका लागून पर्यटनाचेर ताचो वायट परिणाम जाता. थळाव्या आमदारांनी हालींच पळोवणी करून हे विशीं आवाज काडलो. आतां अशें गैरवेव्हार हाचें फुडें सोंसचे नात. कळंगुट पंचायत प्रशासकीय यंत्रणेच्या मजतीन अशा अनधिकृत बेकायदेशीर दुकानांचेर आनी आस्थापनांचेर आदारान खर कारवाय करतली अशें कळंगुटेचे सरपंच जोसेफ सिक्वेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
