भांगरभूंय | प्रतिनिधी
म्हापशें, प्रतिनिधी ः गौरावाडो कळंगूटेतल्या एका व्हिलांत ऑस्ट्रेलियन पर्यटक देंविल्लो. त्या व्हिलांत जाल्ले चोरी प्रकरणांत पुलिसांनी डी. एम. संतोष (27, शिमोगा- कर्नाटक) हाका अटक केल्या. दुबाविता कडल्यान 3 लाखांच्यो चोरयेच्यो वस्तू जप्त केल्यात.
ही चोरयेची घडणूक 16 नोव्हेंबराक घडिल्ली. ह्या प्रकरणांत अॅश्ली ह्या ऑस्ट्रेलियन पर्यटकान कळंगूट पुलिशेंत कागाळ नोंद केल्ली. कागाळदाराचे कुटुंब व्हिलांत नाशिल्ल्याची संद घेवन मध्यान रातीं दुबावीत आरोपी भितर भितर सरलो. 3 लॅपटॉप, एक घडी आनी 25 हजार देशी विदेशी चलन मेळून वट्ट 3.25 लाखांचो म्हाल चोरलो. कासा दास इम्रास ह्या व्हिलाच्या आवारांतल्या सीसीटीव्हींत दुबावीत आरोपीचें तोंड दिसता.
दुबावीत चोरी करून मूळ गांवांत पळून गेल्ल्याची म्हायती चवकशे वेळार पुलिसांक मेळ्ळी. ते प्रमाण पुलीस पंगडान शिमोगा कर्नाटकांत वचून दुबाविताक धरून गोंयांत हाडून अटक केली. पुलीस निरिक्षक परेश नायक हांच्या फुडारपणा खाला उपनिरिक्षक योगेश मांद्रेकार, राजाराम बागकार, हवालदार सतीश सावंत, विद्यानंद आमोणकार, हवालदार विजय नायक, भगवान पालयेकार, राजा परब, आदर्श नागेकार, गौरव चोडणकार आनी प्रणय गावस हांच्या पंगडान ही कामगिरी केली.
मजगतीं, दुबावीत खांपो चोर आसून देशांतल्या वेगवेगळ्या वाठारांनी तांणी चोरी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
