भांगरभूंय | प्रतिनिधी
डिलायला लोबोः क्लब बेकायदो, बार- रॅस्टोरंण्ट परवानो घेवन चालू
भांगरभूंय । प्रतिनिधी
पणजीः कळंगूटे उपरांत आसगांवां नायट क्लबा वयल्यान बोवाळ जावपाक सुरवात जाल्या. आसगांवां एक नायट क्लब आयिल्ल्यान लोक खुबळ्ळ्यात. हे नायट क्लब बेकायदेळीर आसात. तांकां कसलेच परवाने नात. तरी लेगीत तांकां पंचायतीन परवाने दिल्यात. तशेंच कळंगूटे जे नायट क्लब चोरवाटेंतल्यान आयल्यात तश्योच चोरवाटो आसगांवच्या क्लबांनी सोदल्यात, अशें थळावी आमदार डिलायला लोबो हांणी मान्य केलां.
आसगांव हें भारताचें बेव्हरली हिल्स म्हूण फामाद जालां. दर्यादेगे पसून मात्सो पयस हो आसगांव गांव थंड आनी सोबीत वाठार. सुसेग आनी शांतताय सोदपा खातीर बऱ्या दर्ज्याचे गिरेस्त पर्यटक आसगांवां येतात. उच्च दर्जाचे रॅस्टोरंण्ट आनी बंगले ह्या वाठारांत आसात. सामान्य पर्यटकांक परवडपा सारको हो वाठार न्हय. आतां ल्हवू ल्हवू नायट क्लबांनी आसगांवां प्रवेश करपाक सुरवात केल्या.
आसगांव पंचायत रस्त्यार रुम्बा हो नायट क्लब आयिल्ल्यान लोकांनी खूब विरोध केलो. हो क्लब बंद जावचो म्हूण लोकांनी मेणवात रॅली काडली. हो एक क्लब येत जाल्यार बाकीचेर क्लब ताच्या फाटोफाट येतले आनी आसगांवची शांतताय इबाडटली, असो भंय थळाव्यांनी उक्तायल्लो.
कळंगूटे चडशे नायट क्लब आनी डान्स बार उच्च न्यायालयान बंद केल्यात. ताका लागून ते परतून सुरू करपाक शेजारच्या मतदारसंघांनी घुसपाक सोदतात. कळंगूटे बदला हे नायट क्लब आसगांवां व्हरून तांचें नांव बदलून ते परतून चालू करपाचें कारस्थान सध्या चल्लां, अशी म्हायती गोपांनी दिल्या.
डान्स बार आनी नायट क्लबांक परवानगी मेळना. ताका लागून कळंगूटेच्या डान्स बार धनयांक एक बरी चोरवाट मेळिल्ली. तांणी बार अॅण्ड रॅस्टोरंण्ट परवानो पंचायतींतल्यान घेवन भितर डान्स बार चालू केल्ले आनी चलयांक नाचयताले.
हेच चोरवाटेंतल्यान आसगांवां रुम्बा क्लब सुरू जाल्लो, हें थळावी आमदार डिलायला लोबो हांणी केल्ल्या विधाना वयल्यान स्पश्ट जाता.
गोंयांतलीं सगळ्यांत बरे रॅस्टोरंण्ट आसगांवां आसात. एक नायट क्लब आयले उपरांत हेर क्लबूय थंय येतले. वागातोराक ह्या नायट क्लबांनी नाका पुरो करून उडयला आनी थंयचे लोक त्रास काडटात. हे नायट क्लब आसगांवां नाकात, हें आपलें मत. ह्या क्लबां आड आसगांवकारांनी बरी भुमिका घेतल्या, अशें डिलायला लोबो हांणी सांगलें. कळंगूटे बंद पडिल्ले डान्स बार फाटल्या दारांतल्यान आसगांवां येतात काय कितें, असो प्रस्न डिलायला लोबो हांकां विचारलो. ताका जाप दितना तांणी सांगलें, सगळे पंचायतीचेर निंबून आसा. परवानगी घेवपा खातीर ते पंचायती कडेन येतात, आमदारा कडेन न्हय. पूण हे नायट क्लब आसगांवां नाकात, हें मत पंचायत आनी सरपंचाचें आसा. आमी नायट क्लबांचो बोवाळ आसगांवां सोंसून घेवचे नात, अशें डिलायला लोबो हांणी सांगलें.
‘परवानो रद्द करपाचो आदेश आपणे दिल्लो’
‘भांगरभूंय’ कडेन उलयतना शिवोलीची आमदार डिलायला लोबो हांणी सांगलें, रुम्बा नायट क्लबान पंचायती कडेन तात्पुरतें बार अॅण्ड रॅस्टोरंण्टाची परवानगी मागिल्ली आनी सरपंचान ती ताका दिल्ली. परवान्या खातीर राबितो दाखलो जाय पडटा, पूण तो दाखलो क्लबांक पंचायतीन दिवंक नाशिल्लो. आपणे पंचायत आनी थळाव्या लोकां वांगडा बसका घेतली. ह्या क्लबांक राबितो दाखलो ना, ताका लागून तांकां परवानो मेळपाक शकना. हे खातीर तांकां दिल्लो परवानो रद्द करचो, असो आदेश दिले उपरांत क्लबाचो धनी आपूण जावन मुखार आयलो आनी आपलो परवानो रद्द करपा खातीर अर्ज केलो, अशें डिलायला लोबो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
