भांगरभूंय | प्रतिनिधी
पयलें इनाम जाहीर; मंगळारा पुरस्कार, पदक वितरण
भांगरभूंय । प्रतिनिधी
पणजीः सर्वोत्कृश्ठ कामगिरी खातीर कळंगूट पुलीस स्टेशनाक अंदूंचो उत्कृश्ठ पुलीस स्टेशन म्हूण पयलें इनाम फावो जालां. अंदूं उत्कृश्ठ कामगिरी केल्ल्या 53 पुलीस अधिकारी आनी कर्मचाऱ्यांक पुलीस म्हासंचालक इन्सिंगनिया पदक जाहीर केलां.
हे विशींचो आदेश पुलीस मुख्यालयाचे अधिक्षक शेखर प्रभुदेसाय हांणी जारी केला. हे पुरस्कार आनी पदक मंगळारा 20 डिसेंबराक पुलीस मुख्यालयाच्या मैदानाचेर जावपी पुलीस थापणूक दिसाचे कार्यावळींत भेटयतले.
ह्या आदेशा प्रमाण राज्यांत सगळ्यांत बरी कामगिरी करून गुन्यांवांचो तपास तशेंच गुन्यांव आडायिल्ले खातीर कळंगूट पुलीस स्टेशनाक पयलें इनाम फावो जालां. कळंगूट पुलीस स्टेशनाक 30 हजार रुपया, घोळटो करंडक आनी प्रशस्तीपत्र मंगळारा जावपी कार्यावळींत भेटयतले.
दुसरें इनाम वेर्णें पुलीस स्टेशनाक फावो जालां. तांकां 20 हजार रुपया, घोळटो करंडक आनी प्रशस्तीपत्र भेटयतले. तिसरें इनाम पणजी पुलीस स्टेशनाक फावो जालां. तांकां 10 हजार रुपया, घोळटो करंडक आनी प्रशस्तीपत्र भेटयतले. गोंय पुलिसांक जाहीर केल्ल्या पुलीस म्हासंचालक इन्सिंगनिया पदक दक्षीण गोंय पुलीस अधिक्षक अभिषेक धानिया, पुलीस नियंत्रण विभागाची महिला निरिक्षक मीरा डिसिल्वा, पुलीस मुख्यालयाचे निरिक्षक मेल्सन कुलासो, कुडचडें येरादारी विभागाचे निरिक्षक अर्जुन सांगोडकार, आगशी पुलीस निरिक्षक विक्रम नायक, विशेश विभागाचे पुलीस निरिक्षक उदय गावडे, गुन्यांव फांट्याचे पुलीस निरिक्षक नितीन हळर्णकार, मुख्यमंत्री सुरक्षा विभागाचे निरिक्षक रामकृष्ण परब (आयआरबी), पुलीस उपनिरिक्षक दिलखुश देसाय, अरूण कुमार तलेकार, सत्यवान गांवकार, ह्रषिकेश पाटील आनी हेर कर्मचारी मेळून 53 जाणांक पुलीस म्हासंचालक इन्सिंगनिया पदक दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
