भांगरभूंय | प्रतिनिधी
थळाव्यांक परतून परतून वीज कार्यालयाचेर दिवची पडटा धडक
भांगरभूंय । प्रतिनिधी
म्हापशें: कळंगूटे वीज पुरवणेंत गंभीर समस्या निर्माण जाल्या. वीज खात्याच्या मुख्य अभियंत्यां वांगडा घेतिल्ले बसकेंत लेगीत ताचेर कसलोच उपाय सांपडूंक ना. साळगांवचें मुख्य वीज केंद्र सुरू जाले उपरांतूच दर्यादेग वाठारांतली वीज समस्या सोंपतली, अशी आस्त कळंगूटेच्या लोकांक खात्या वतीन दितात.
सध्या उबाळ सुमारा भायर वाडला. ताका लागून लोकांक ताचो खूब त्रास जावपाक लागल्यात. अशे परिस्थितींत फाटल्या दोन म्हयन्यांच्यान कळंगूटे गांवाक खंडीत वीज पुरवणेक फुडो करचो पडटा. विजेच्या ह्या आपालिपाक लागून कळंगूटेचे लोक बेजारल्यात. बंद जाल्ली वीज पुरवण वरांचीं वरां सुरू जायना, ताका लागून लोकांक चड करून ल्हान भुरग्यांक तशेंच ज्येश्ठ नागरिकांक त्रास सोंसचो पडटा.
कळंगूटे नवें वीज उपकेंद्र उबारून लेगीत गांवांतले वीज पुरवणेंत सुदारणा जावंक ना. आदीं वीज खात्यान हें वीज केंद्र चालीक लागले परांत वीज समस्या सुटावी जातली, असो दावो केल्लो. पूण कळंगूटेची ही समस्या सुटावी जावचे बदला तातूंत आनीक भर पडल्या. ताका लागून वीज खात्याचो दावो फट थारतना दिसता.
विजेच्या आपालिपाक लागून दर दिसा थळाव्या लोकांक वीज कार्यालयांत धांव घेवची पडटा. खंडीत वीज पुरवणेचेर उपाय काडचो, अशी मागणी लोक करतात. मात लोकांचें म्हणणें आनी समस्या आयकुपा खातीर चड करून राती वेळार कार्यालयांत अधिकारी नासतात. वा आसले जाल्यार लेगीत ते फोन उखलिनात. ताका लागून लोकांक कर्मचाऱ्यांचेर ‘तोंडसूख’ घेवन परतून येवचें पडटा.
दिसपट्ट्या विजेच्या आपालिपाक लागून लोकांची वीज उपकरणां पेड्डेर जावपाचे प्रकार घडटात. हे पुरवणेंत केन्ना सुदारणा जातली, हाची शाश्वती वीज खात्या कडल्यान मेळना. हे खातीर कळंगूटचे लोक प्रशासनाच्या कारभाराचेर खर तिडक उक्तायतात.
हालींच कळंगूट पंचायत मंडळ आनी कांय समाजीक कार्यकर्त्यांनी वीज खात्याच्या मुख्य अभियंत्याची भेट घेवन तांचे मुखार समस्या मांडल्यो. तशेंच हॉटेलां सोडून घरगुती वापरांतल्या गिरायकांक सुरळीत वीज पुरवण दिवपाक प्राधान्य दिवचें, अशी मागणी केल्ली. पूण खात्या वतीन हे मागणेची फाटपुरवण जावंक ना.
कळंगूट- कांदोळी ह्या दर्यादेग वाठाराक कांदोळी, कळंगूट आनी नागवें ह्या तीन वीज उपकेंद्रा वरवीं वीज पुरवण जाता. मात ह्या केंद्राक जोडपी 33 केव्ही वीज फावोशी ना. आमकां 220 बाय 110 बाय 33 वीज जोडणेची गरज आसा. साळगांवच्या 350 कोटींच्या मुख्य वीज केंद्राचें काम चालू आसा. हें केंद्र फुडल्या 10 म्हयन्यांत पुराय जातलें. ते उपरांत बार्देसांतल्या दर्यादेग वाठारा सयत अर्द्या म्हालाचो वीज पुरवणेचो प्रस्न सुटावो जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
