भांगरभूंय | प्रतिनिधी
भांगरभूंय । प्रतिनिधी
म्हापशेंः माड्डोवाडो – कळंगुटे दर्या देगेर आशिल्ल्या दोन शॅक रेस्टॉरंटांक मंगळारा फांतोडेर 2 वरांचेर उजो लागलो. तातूंत तांचो गोबोर जावंन सुमार 50 लाखांचें लुकसाण जालें. बासिक रॉड्रिग्ज हांच्या कॅफे सॅण्ड बार बीच शॅकाक पयलीं उजो लागलो. शॅकांतल्या गॅस सिलिंडराचो स्फोट जावंन तो लागींच्या मनोज (अचल) नायक हाच्या बे वॉच शॅकांत वचून पडून ताकाय उजो लागलो.
नेटाच्या वाऱ्याक लागून उज्यान पेट घेतलो आनी अर्द वरांत दोनूय शॅक रेस्टॉरंटांचो गोबोर जालो. उजो लागतगीर दोनूय शॅकांतल्या सुमार 60 कर्मचारी सुरक्षीत सुवातेर धांवले. पिळर्णच्या उजो पालोवपी दलाचो अधिकारी श्रीकृष्ण पर्रीकार, म्हापशेंचो अधिकारी बॉस्को फेर्रांव आनी पणजेच्या चंद्रकांत तुरी हांच्या फुडारपणा खाला जवानांनी उजो पालयलो. दोनूय शॅकां जळ्ळीं मात कुशीच्या शॅकांक उजो लागपा पसून तांणी वाटायलें.
शॅक रेस्टॉरंटातले फ्रीज, म्झुझिक सिस्टम, फर्निचर, विजेची उपकरणां, सोऱ्याच्यो बाटल्यो, कोल्ड ड्रिंक, कंम्प्युटर, गॅस सिलिंडर, गॅस स्टोव, जनरेटर, सीसीटीव्ही, आनी रांदपाचें साहित्याचो गोबोर जालो. मंगळारा सकाळीं कळंगुटेचो आमदार मायकल लोबो आनी सरपंच जोजफ सिक्वेरा हांणी पंचायत मंडळा वांगडा घडणुकेचे सुवातेची पळोवणी केली.
उज्याच्या घडणुकेची दखल घेवंन सरकारान हाचे फुडें दोन शॅकां मदीं जाय तितलें सुरक्षीत अंतर दवोरपाचो नेम लागू करचो अशी सूचोवणी अखील गोंय शॅक धनी संघटनेचो अध्यक्ष मान्युएल कार्दोज हांणी केल्या. माडाच्या चुडत्तांक रोखडोच उजो लागता. ताका लागून ताचे सुवातेर दुसरे पर्यायी वस्तूंचो शॅका खातीर वापर करपाक मेकळीक दिवची अशें तांणे मागलां. कळंगुटेचो सरपंच जोजफ सिक्वेरा हांणी लुकसाण जाल्ल्या शॅक धनयांक सैमीक आपत्ती येवजणे खाला पंचायत अर्थीस मजत दितली अशें सांगलें.
दर्या देगांनी उजो लागपाच्यो जायत्यो घडणुको जाल्यात. फुडाराक अश्यो घडणुको जाल्यार उजो पालोवपा खातीर दर्या देगांनी उजो पालोवपी दलाच्यो फास्ट अॅक्शन टिमी नेमपाचो विचार सरकारान करपाक जाय अशें मायकल लोबो हांणी सांगलें. फोम आनी उदकाचो बंब आशिल्लें नव्या तंत्रगिन्यानाचे वाहन विकतें घेवपाक 80 तें 90 लाख रुपया खर्च येतलो. कळंगुटे सयत हेर दर्या देगांनी ही वाहना दवोरपाची मागणी आपूण मुख्यमंत्र्यां कडेन करतलों अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
