भांगरभूंय | प्रतिनिधी
तिगा दुबावितांक अटक
म्हापशें, प्रतिनिधी ः गौरावाडो, कळंगुटे प्रवासी भाडें मारीवेल्यान गोवा मायल्सचो ड्रायव्हर आनी एका पर्यटकाक मारपेट केली. ह्या प्रकरणांत कळंगुटे पुलिसांनी थळाव्या तीन टॅक्सीकारांक अटक केल्या.
अटक केल्ल्या दुबावितां मदीं लक्ष्मण रामा साळगांवकार (33, गौरावाडो, कळंगुटे), मुकेश रामनाथ मठकार (40, गौरावाडो, कळंगुटे) आनी हेमंत दीना मळीक (33, हासापूर, पेडणें) हांचो आस्पाव आसा.
सोमारा 24 तारखेक दनपारां 3 वरांचे सुमाराक फेयर फील्ड हॉटेलाच्या वाठारांत ही घडणूक घडली. ह्या प्रकरणांत हॉटेलाचो कर्मचारी एल्विस रॉड्रीगजान कळंगुटे पुलिशेंत कागाळ केल्या. ते प्रमाण पुलिसांनी गुन्यांव नोंद करून तिनूय दुबावितांक अटक केली. पर्यटकांक व्हरपा खातीर गोवा मायल्स गाडी हॉटेलांत आयिल्ली. त्या वेळार वयल्या दुबावितांनी गाडी थांबयली. तशेंच गाडयेंत बसपी हॉटेलाचो गिरायक अनुराग ह्या पर्यटकाक मारलो. ह्या झगड्यांत अनुरागाची भांगराची सरपळी तुटली. दुबावितांनी गोवा मायल्स टॅक्सी ड्रायव्हराकूय मारपेट केली. प्रवासी भाडें व्हरपाचो यत्न केल्यार गंभीर परिणाम जातले, अशीय धमकी दिली.
पुलीस उपअधीक्षक विश्वेश कर्पे, निरिक्षक परेश नायक हांच्या मार्गदर्शना खाला फुडलो तपास सुरु आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
