भांगरभूंय | प्रतिनिधी
म्हापशें : तिवायवाडो, कळंगूटे कॅसिनोंते जुगार खेळपाक आयिल्ल्या सुरत गुजरात हांगच्या राजभर रविनारायण रामदर्शनभाई (२७) ह्या तरणाट्याचो ताच्याच इश्टान खून केलो. कॅसिनोंतल्या अर्थीक वादांतल्यान हो खी जाल्ल्याचो अदमास आसा. फरारी दुबाविताचो पुलीस सध्या सोद घेतात.
ही घडणूक शेनवारा सकाळीं सुमार ६ वरांचेर तिवायवाड्यावेलें रिसॉर्ट सांता मोनिकांत घडली. सुरत गुजरातचो एक पर्यटक गट कळंगुटे आयिल्लो. हो पंगड तिवायवाडा हांगच्या कासा दी कॅसिनो ह्या ऑफ-शोर कॅसिनोंत देंवलो. तांणी चार कुडी आरक्षीत केल्यो.
शेनवारा २८ तारखेर सकाळीं कॅसिनो जुगारांत अर्थीक वेव्हारावेल्यान ह्या पर्यटकां मदल्या चार जाणां मदीं वाद जालो. वादाचें रुपांतर मारपेटांत जालें. तिगांनी मरण आयिल्ल्या राजभर हाचेर सुरयेन हल्लो केलो आनी ताका मरपेट केली. राजभर हो स्वताचो जीव वाटोवपाक जखमी अवस्थेंत रक्तान माखिल्लो आसतनाच कॅसिनो हॉटेलांतल्यान भायर सरलो आनी तो मुखारचे एका सांता मोनिका रिसॉर्टांत आसरो घेवपाक धांवलो. मात दुबावीत इश्टांनी ताचो फाटलाव करून आनी रिसॉर्टच्या स्विमिंग पुला लागसार ताका धरलो आनी एकल्यान तिडकीन ताच्या पोटार सुर्यान वार केलो. रक्तान माखिल्ल्या राजभर हाका थंयच मरण आयलें.
दुबावितांनी खुना खातीर वापरिल्लो सुरो स्विमिंग पुलांत उडोवन घडणुके सुवातेवेल्यान पळ काडली. राजभर हाचे छातयेर आनी पोटार सुरयेन वार केल्ल्यो जखमो आसात.
हे घडणुकेची म्हायती मेळटांच कळंगूटे पुलीस निरीक्षक लक्षी आमोणकार हांणी सहकारी पुलिसां सयत घडणुके सुवातेर धांव घेवन पंचनामो केलो. पुलीस अधीक्षक हरीशचंद्र मडकयकार, विश्वेश कर्पे हांणी घडणुके सुवातेक भेट दिवन पुलिसांक गरजेची सुचवणी दिल्यो. सुण्यांचो पंगडाक हाडलो. तशेंच तज्ञांनी चवकशी केली. पंचनाम्या उपरांत कूड पोस्टमार्टमा खातीर गोमेकॉंत धाडल्या.
मजगतीं, दुबावितांनी गुन्यांवांत वापरिल्लो सुरो पुलिसांनी स्विमिंग पुलांतल्यान जप्त केलो. सीसीटीव्ही फुटेजीच्या आदारार पुलीस दुबाविताचो सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
