भांगरभूंय | प्रतिनिधी
भाजप शासीत मुख्यमंत्र्यांची बसका
मुख्यमंत्री डॉ. प्रमोद सावंतांची उपस्थिती
पणजी : गती शक्ती, हर घर जल, स्वामित्व, डीबीटी अशा तरेकवार केंद्रीय येवजण्यांची कारवाय राज्यांनी करची असो संदेश प्रधानमंत्री नरेंद्र मोदी हांणी दिला. दिल्लींत भारतीय जनता पक्षाचे मुख्यमंत्री तशेंच उपमुख्यमंत्र्यांची बसका जाली. हे बसकेंत प्रधानमंत्र्यांनी मार्गदर्शन केलें.
गोंयचे मुख्यमंत्री डॉ. प्रमोद सावंत हे बसकेक हाजीर आशिल्ले. भारतीय जनता पक्षाचे 12 मुख्यमंत्री आनी 8 उपमुख्यमंत्री बसकेक हाजीर आशिल्ले. भारतीय जनता पक्षाचे राष्ट्रीय अध्यक्ष जे. पी. नड्डा बसकेक हाजीर आशिल्ले.
गावगिऱ्या वाठारा विशीं उलयतना प्रधानमंत्र्यांनी गोवर्धन येवजणेचेर भर दिलो. रसायनांचो वापर करिनासतना शेतीचें उत्पादन वाडोपाचेर भर दिवपाची गरज आसा. वेवसाय सुलभतेचेर (इओबी) सगल्यांनी लक्ष दिवपाक जाय. वेवसाया खातीर देशांत पुरक वातावरण तयार जावपाक जाय. राज्यांनी हाचे खातीर तरेकवार उपाय येवजण्यो करपाक जाय. अंत्योदर तत्वाचेर राज्य सरकारांनी वावर करपाक जाय. तरणाट्यांनी खेळाच्या सर्तींत वांटेकार जावन नामना जोडची म्हूण यत्न जावपाक जाय. राज्यांनी खेळा खातीर दर्जेदार सुविधांची निर्मिती करपाक जाय अशें प्रधानमंत्र्यांनी म्हणलें.
केंद्राच्या कल्याणकारी येवजण्यांचो नियाळ प्रधानमंत्र्यांनी घेतलो. गावगिऱ्या वाठारातल्या लोकां मेरेन येवजण्यो पावपाची गरज आसा. अमृत सरोवर येवजण तशेंच हर घर तिरंगा मोहिमेचेर विचारविनिमय जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
