भांगरभूंय | प्रतिनिधी
पणजी : जप्त केल्ल्या ड्रग्साचें प्रमाण परिवर्तनीय आसा. तशेंच दुबावीत १६ नोव्हेंबर २०२२ दिसा सावन बंदखणींत आसा, अशें निरीक्षण नोंद करून न्यायालयान दुबावीत कल्पेश द्विवेदी (मध्यप्रदेश) हाका ड्रग्ज तस्करी प्रकरणांत २५ हजार रुपया आनी हेर अटींचेर सशर्त जामीन मंजूर केलो. हे विशींचो आदेश म्हापशेंच्या अतिरिक्त सत्र न्या. अपूर्वा नागवेंकार हांणी दिलो.
अमली पदार्थ विरोधी पंगडान (एएनसी) ड्रग्ज तस्करी प्रकरणांत १६ नोव्हेंबर २०२२ दिसा गुन्यांव दाल केलो. ते प्रमाण, पंगडान गुपितांचे म्हायती वेल्यान गिरकरवाडो – हरमला छापो घातलो. तेन्ना पंगडान मध्यप्रदेशच्या कल्पेश द्विवेदी ह्या तरणाट्याक ताब्यांत घेवन चवकशी केल्ली. ताचे कडल्यान ७.४५ लाख रुपयांचे २०.६० ग्रॅम मेथाफेथामेन, ११.४५ ग्रॅम ऍक्टसी पावडर, ४.१० ग्रॅम एलएसडी लिक्वीड आनी ५० ग्रॅम चरस जप्त केल्लें. एएनसीचे तेन्नाचे पुलीस उपनिरीक्षक रोहन मडगांवकार हांणी दुबावीत द्विवेदी हांचे आड घुवळे वखदां विरोधी कायद्याच्या विवीध कलमां खाला गुन्यांव दाखल करून अटक केल्ली.
उपरांत ह्या प्रकरणांत तपास पुराय करून २३ मे २०२३ दिसा न्यायालयांत आरोपपत्र दाखल केलें. उपरांत जप्त केल्ल्या ड्रग्सचो न्यायवैद्यक अहवाल २६ मार्च २०२४ दिसा न्यायालयांत सादर केलो. हाचे मजगतीं दुबावीत द्विवेदी हांणी न्यायालयांत जामीन अर्ज दाखल केलो. ह्या प्रकरणांत ऍड. ए. दळवी हांणी न्यायालयांत युक्तिवाद मांडून जप्त केल्ल्या ड्रग्साचें प्रमाण परिवर्तनीय आशिल्ल्याचें न्यायवैद्यक अहवालांतल्यान स्पश्ट जाल्ल्याचो दावो केला.
तशेंच जप्त केल्लो ड्रग्स आनी न्यायवैद्यक अहवालांतलो ड्रग्ज वेगळो आशिल्ल्याचो दावो करून जामीन मंजूर करपाची मागणी केली. ह्या प्रकरणांत न्यायालयान दोनूय बाजू आयकून घेतले उपरांत वयलें निरीक्षण नोंद करून दुबावीत कल्पेश द्विवेदी हाका २५ हजार रुपया, दर म्हयन्याचे १० तारखेक तपास अधिकार्या मुखार हजेरी लावप आनी हेर अटींचेर सशर्त जामीन मंजूर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
