भांगरभूंय | प्रतिनिधी
फाटल्या सप्तकांत आशाढी एकादशीची वारी सुरू आसतना अचकीत एक दुखेस्त खबर कानार आयली. वारी चलत पंढरपुरा विठ्ठलाचें दर्शन घेवपाचे वाटेर आसतना शशिकांत नागेशकर हांकां काळजाच्या खर आताकान मरण आयलें.
शशिकांत नागेशकार हांकां सगलो लोक ‘शशी भाई’ म्हूण वळखताले. फोंडें म्हालांतल्या नागेशी गांवांत एका कला सक्त घराण्यांत जल्माक आयिल्लो हो देव नागेशाचो निस्सीम भक्त. अंत्रूज म्हालांतच न्हय तर पेडणें ते काणकोण आनी वास्को ते वाळपय मेरेन फामाद आशिल्लो हो एक जातीवंत नाट्य दिग्दर्शक. ते भायर, एक नामनेचो अभिनेतो, लेखक, नेपथ्यकार अशे बहुआयामी कलांचो धनी म्हणुनूय शशी भाईची ख्याती आशिल्ली.
सांगपाचें म्हणल्यार, शशी भाईन नाट्य कलेचें कसलेंच शास्त्रशुद्ध शिक्षण घेवंक नाशिल्लें. मात शशी भाई जेन्ना नाटकाचें दिग्दर्शन करतालो तेन्ना हो एक कोण तरी नाट्य शास्त्राचें शास्त्रशुद्ध शिक्षण घेतिल्लो दिग्दर्शक अशें आशिल्लें वरीच जाणवतालें.
पैलू पडिल्ल्या हिऱ्यांचेर कोणूय दावो करता. मात कोळशाचे खणींत हिरे सोदून काडप ही खरी कळाशी. शशी भाईच्या आंगांत आशिल्ली हीच कळाशी तांकां हेरा पासून वेगळे करता. नव्या दर्जेदार कलाकारांक घडोवपाचो ध्यास घेतिल्लो हो नाट्य क्षेत्रांतलो प्रज्ञावंत. नाट्य क्षेत्रांतल्या उमेदी कलाकारांक हेरून तांचे कलेक पैलू दीत शशी भाईन तांकां घडयले. भाईन घडयल्ले अशे हे हिरे आमकां आयज गोंयभर पळोवपाक मेळटात.
शशी भाई जें कितें करतालो तें निश्ठेन आनी प्रामाणीकपणान करतालो. कला अकादमीचे अ आनी ब गट नाट्य सर्तींत शशी भाईल्या नाटकांक आनी कलाकारांक सेगीत पयलें, दुसरें अशीं इनामां मेळ्ळ्यांत. साध्या सरळ भाशेन सांगचें म्हणल्यार, ह्या मनशान नाट्य कले खातीर स्वताक इतलो ओंपून घेतिल्लो, तांणी आपल्याक नाटकाक वेळ दिवपाक मेळना म्हूण स्वताचे नोकरेचेरूय उदक सोडलें.
हंस थिएटराचे विजयकुमार नायक, सर्गेस्त सोमनाथ नायक, सर्गेस्त विष्णू सुर्या वाघ ह्या दिग्गजांच्या समकालीन शशी भाई गाडी चलय नाशिल्ले. तांणी आपयल्यार धा जाण तांच्या दारान गाडी घेवन तांकां व्हरपाक उबे रावपाचें, मात शशी भाई चडसो चलत वचप पसंत करतालो. तशीच शशी भाई विशीं आनीक एक गजाल सांगपा सारकी. आमी आमचे आशिकुशीक कितलेशेच जाण पळयतात जे पुरस्कारां खातीर हपापलेले आसतात. इतलेच न्हय तर पुरस्कारां खातीर लेमेलेमे करपीय खूब जाण पळोवपाक मेळटात. मात, ह्या सगल्याक शशी भाई अपवाद आशिल्लो. वयल्यान जे सत्कार, पुरस्कार मागिनासतना शशी भाईक येताले ते तो आपले तत्वांनी नम्रपणान न्हयकारतालो. ‘आरे आजकाल जो तो फावरान पुरस्कार मेळयता. जांची पात्रता नासता तांकांय पुरस्कार मेळटात. अशा वांगडा जर आमकांय पुरस्कार मेळ्ळे जाल्यार आमकांय लोक तातूंतच गृहीत धरतले’ हे प्रामाणीक हुस्क्यान शशी भाई सत्कार, पुरस्कार हांचे कडल्यान पयस रावलो. शशी भाई धनी आशिल्लो तो नाट्य सर्तींच्या इनामांचो.
शशिकांत नागेशकार हांणी जायत्या नाट्यमंडळांनी आपले कले वरवीं कलाकार घडयल्यात अशे म्हणले जाल्यार तें चुकीचें थारचें ना. देखीक हंस संगीत नाट्यमंडळ-वारखंडे, सिध्दीनंदन थिएटर्स – नागेशी, अंत्रुज लळीतक- नागेशी, नागेश महालक्ष्मी प्रासादीक नाट्य समिती, रवळनाथ प्रासादीक नाट्य समिती, चौरंग संस्था – नागेशी, ओम कला सृष्टी-बांदोडा, वैरागी मंडळ अश्या साबार संस्थांचो तो आधारस्तंभ आशिल्लो.
हौशी रंगभूमी, कला अकादमीची अ आनी ब गट, वेवसायीक रंगभूमी, ऐतिहासिक नाट्य स्पर्धा, महिला संगीत नाट्य स्पर्धा अशे साबार कडेन शशी भाईन रंगमाची गाजयल्ली. शशी भाई गोंयांतलो ऐतिहासिक नाटकांचो नामनेचो दिग्दर्शक आशिल्लो. स्वामी, श्रीमान योगी, घाशीराम कोतवाल, रक्तरंगण, अहं देवयानी, राहिले दूर घर माझे हीं आनी अशी हेर साबार नाटकां शशी भाईन बसयल्लीं आनी तो अभिनयूय करतालो.
शशी भाईची गांवच्या देव नागेश महारुद्राचेर खूब भावार्थ आशिल्लो. नागेश महारुद्राच्या सप्ताहाक तर दोन उत्सवमुर्ती दिश्टी पडटाल्यो. एक स्वता नागेश महारुद्र आनी दुसरो शशी भाई. शशी भाई आतां आमच्यांत ना मात शशी भाईन नागेश महारुद्राच्या देवळांत दर सप्तकांत जावपी सोमाराक आपलें अस्तित्व तिगोवन दवरलां अशें आमच्यान म्हणूं येता. शशी भाई दर वर्सा नागेश महारुद्राची आरास तन मन धन लावन करतालो. ती आरास आतां तांणी दर वर्सा करची पडटाली. मात अंदूं शशी भाईन अशे पद्धतीन आरास करून दवरल्या जी फुडली सुमार कितलींशींच वर्सां तरी नव्यान करपाची गरज ना. म्हणजे शशी भाई नागेश महारुद्राच्या सप्तकांत मूर्त स्वरुपांत जरी नासलो तरी कीर्त स्वरुपांत आमकां दिश्टी पडटलो.
भाई वांगडच्यो फाटल्यो कांय घडामोडी पळयल्यार रावन रावन एक प्रस्न पडटा. शशी भाई हो दैवी साक्षात्कारी आशिल्लो काय? कारण तो सामको देवभक्त. तातूंतले तातूंत विठ्ठल हें ताचें परम दैवत. फाटले दसमीक शशी भाई अमरनाथ यात्रेक गेलो आनी थंय आडकून पडलो. शशीभाईचो खंयच संपर्क जायना. आनी उपरांत अचकीत सप्तका उपरांत शशी भाईन स्वता संपर्क सादीत आपली खुशालकाय कळयली. आनी अंदूं एका वर्सान दसमीकूच शशी भाई वैकुंठवासी जालो. आतां वैकुंठवासी कित्याक? तर ताकाय कारण आसा. ज्या मनशाक पांडुरंगाचे वारीत मरण येतलें तो मनीस वैकुंठवासी जातलो अशे शशी भाई सदांच सांगतालो. आनी घडलेंय तशेंच, आमचो शशी भाई वैकुंठवासी जालो!
स्त्रिग्धरा नायक
9545199535
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
