भांगरभूंय | प्रतिनिधी
डॉ. भूषण भावेः मासोड्ड्यां सत्तरी लोककला महोत्सवाचें उक्तावण
भांगरभूंय । प्रतिनिधी
वाळपयः गोंयच्या सांस्कृतीक मळा वयले उदरगती खातीर सत्तरी आनी काणकोण म्हालांनी म्हत्वाचें योगदान दिलां. सत्तरी म्हालान वेगवेगळ्यो कला जिवीत दवरचे खातीर म्हत्वाचें योगदान दिवन गोंयांत एक विशिश्ट तरेची प्रतिमा निर्माण केल्या. सगळ्यांनी एकठांय येवन सादर केल्ली कला म्हणल्यार लोककला. लोकांची मनरिजवण करचे खातीर कलेचो जल्म जालो. कलेंतल्यान निर्माण जाल्ले मनरिजवणेक लागून बौद्धीक उदरगत जाता. ते खातीर येता त्या काळांत ही कला जिवीत दवरचे खातीर तरणाट्यांनी म्हत्वाचें योगदान दिवचें, अशें गोंय विद्या प्रबोधिनी उच्च माध्यमीक विद्यालयाचे प्राचार्य डॉ. भूषण भावे हांणी सांगलें.
शांतादुर्गा कला मंच मासोड्डें तशेंच गोंय कला आनी संस्कृती खातें, नेहरू युवा केंद्र पणजी आनी सम्राट क्लब वाळपय हांच्या जोडपालवान मासोड्ड्यां लोककला महोत्सव आयोजीत केल्लो. ताच्या उक्तावण सुवाळ्यांत डॉ. भावे उलयताले. ह्या वेळार माचयेर वाळपयची नगराध्यक्ष प्रसन्ना गांवस, सम्राट इंटरनॅशनल क्लबाचे अवीन नायक, कार्यावळीचे उद्घाटक नाट्य दिग्दर्शक अभय जोग, सम्राट क्लबाचे अध्यक्ष अंकुश धुरी, शांतादुर्गा कलामंचाचे अध्यक्ष रमेश गांवस, देवस्थानाचे उपाध्यक्ष उमेश गांवस, संयोजक गौरीश गांवस, देवस्थानाचे पुरयत दशरथ गांवस हाजीर आशिल्ले.
पेटपी वाती आमकां स्पश्ट दिसतात, पूण जळपी वाती आनी तेलाचो चडसो कोणूच विचार करिना. लोककला अशेच तरेची. लोककला ही लोकांच्या वेदनेचो हुंकार. वेदना उक्तावपाची संद लोककलेच्या माध्यमांतल्यान मेळटा. लोककला ही खळखळपी प्रवाहा प्रमाण आसा. लोककलेंतल्यान हेर कला निर्माण जाल्यात. हे खातीर लोककलेची उदरगत जावपाक जाय जाल्यार ती धिटायेन तिगोवपाक जाय जाल्यार लोककला महोत्सवाच्या आयोजनांतल्यान अशे तरेची प्रक्रिया आमी फुडें व्हरपाक शकतात. आयच्या ज्येश्ठ कलाकारांनी ही लोककला जिवीत दवरल्या. मात येता त्या काळांत फुडले पिळगेक हाची म्हायती आनी व्हडपण तिगोवन दवरपाक जाय जाल्यार ताचें दस्तावेज तयार करप गरजेचें आसा, अशें अभय जोग हांणी सांगलें.
नगराध्यक्ष प्रसन्ना गांवस हांणी सांगलें, परंपरीक कला खूब गरजेच्यो. शांतादुर्गा कलामंचान आतां मेरेन ह्या मळार म्हत्वाचें योगदान दिवन ह्यो कला जिवीत दवरपाचो यत्न केला. अश्या उपक्रमांत दरेकल्यान आदार करप गरजेचें आसा.
अवीन नायक हांणी सांगलें, लोककला जीण घडोवचे खातीर म्हत्वाची आसा. दुख्खी जिणेक सुखाचो मार्ग निर्माण करून दिवपी ही लोककला आतां मेरेन समाजाभिमूख जाल्या. लोककलेचो जागर दरेका गांवांनी जावप गरजेचें आसा.
अंकुश धुरी हांणीय ह्या वेळार आपले विचार मांडले. रमेश गांवस हांणी संस्थेन फाटल्या 23 वर्सांत केल्ल्या वावराचो नियाळ घेतलो. शोभा गांवस हांणी सुत्रसंचालन केलें. दीपाली गांवस हांणी उपकार मानले. गौतमी गांवस हांणी सोयऱ्यांची वळख करून दिली.
हे कार्यावळींत सत्तरी म्हालांतल्या लोककलाकारांचो मानेस्तां हस्तुकीं भोवमान केलो.
भोवमान केल्ले लोककलाकार
सुभद्रा गांवस (केरी सत्तरी लोककलाकार), सकु प्रकाश गांवस (मासोड्डें सत्तरी रणमाले), यशवंत भिमा झर्मेकार (झरमे सत्तरी रणमाले), गोपाळ नारायण गांवकार (सुर्ला सत्तरी रणमाले), जानकी विठू मांद्रेंकार (शेळप सत्तरी).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
