कलियुगांतले नरकासुर

भांगरभूंय | प्रतिनिधी

नरकासुर हें वायट, दुश्ट, अनैतीक प्रवृत्तींचें प्रतीक म्हूण ताका दरवर्सा लासतात खरें, पूण हालींच्या वर्सांनी ताचे क्रुरतेक ‘सोबीतकाय’ दिवपाचो यत्न करतात, तेन्ना ताचो वध करपी देव कृष्णाचो मात विसर पडपाक लागला, अशें दिसता. आदीं नरकासुरा मुखार एक भुरगो कृष्णाच्या भेसांत तरसाद घेवन नाचतालो, तो आतांच्या तेंपार दिसना. आतां डीजेच्या कानाचे पड्डे फोडपी करंदायेच्या तालार तरणाटे बेभान जावन भार काडटात. नरकासुराचो गोबोर जाले उपरांतूय ताच्या आत्म्यान तांचे कुडींत घर केल्ल्या कारणान फांतोडेचेर अभ्यंगस्नान करपाचें सोडून सकाळ मेरेन कोप मारत पडिल्ले दिसतात.
आदीं तण, कट्ट्यो, कोयर एकठांय करून दुडू मोडिनासतना एक दीस पयलीं नरकासुर उबो करताले. आयड नरकासुरांच्या कुडीचें लोखणाच्या वारावांचें फॅब्रिकेशन, ताचेर साक, पुठ्ठे वापरून कात चडोवप आनी उपरांत स्प्रे पेण्टान रंगोवप हो ‘स्मार्ट’ राकेस निर्मितीचो प्रकल्प पंदरा दिसां आदीं सुरू जाता. प्रकल्पाक हजारांनी दुडू लागिल्ल्यान वर्गणी एकठांय करची पडटा. कार्यकर्त्यांक खूश दवरचे खातीर राजकारणी नरकासुर सदळ हातान ह्या प्रकल्पाक दुडू दान करपाक तयार आसतात. हरशी समाजांतल्या गरीब गरजूं खातीर, बऱ्या कामां खातीर वापरपाक जाता त्या दुडवांचो नरकासुर दहनांत गोबर जाता, हाचो विचार करपाचें समाजांतल्या बुदवंतांनी आतां सोडून दिलां.
कलियुगांत नरकासुराचें साजरीकरण जाल्लें दिसता. स्मार्ट नरकासुराक जल्माक घालपी मंडळांक सर्तींत रोख इनामां भेटयतात. कलियुगांतले नरकासुर आंगलोटान धिप्पाड, कातीन कीट्ट काळे, दातांचे सुळे, बटबटीत तांबडे दोळे ह्या रुपांत आसपाची तशी गरज ना. तुमचे आमचे भशेन दिसपी तामसीक, नकारात्मक नरकासुरी प्रवृत्तीचे लोक जगभर व्हड मान प्रतिश्ठेन वावुरतना दिसतात. तांची कु- प्रवृत्ती, कुकर्मां जाणा आसतना जगभर तांची तोखणाय करपाचें प्रस्थ मात वाडत आसा. अनुयायी, भक्तसमुदाय तांकां तकलेर घेवन नाचतना सद्गुणी, सिद्धांतवादी, प्रामाणीक, शिस्तप्रिय मनशांक फावो तसो मान मेळना जाला. ताचें ताजें उदाहरण म्हणल्यार प्रगल्भ लोकशाय राश्ट्र अमेरिकेचे आदले राष्ट्राध्यक्ष डॉनाल्ड ट्रंप. उद्योग धंद्यात फटींगपणां, बायलांचो लैंगीक छळ, राष्ट्राध्यक्ष पद भोगतना पदाचो गैरवापर आनी हेर अशे नव्वद मायत आरोप तांचे आड लागल्यात. दिसपट्टे तांकां न्यायालयांत हाजीर रावचें पडटा. अटक, जामीन हें सत्र चालूच आसा. हें सगळें चल्लां आसतना 2024 वेंचणुकां खातीर उत्सूक रिपब्लिकन पक्ष उमेदवारांचे सर्तींत ट्रंपाची लोकप्रियता हेरांचे तुळेन मैलांनी मुखार आसा. सद्या बऱ्याचशा राज्यांतल्या सर्व्हेंत लोकप्रीयतेचे बाबतींत ट्रंपान राष्ट्राध्यक्ष बायडेनाक फाटीं सारला.
युक्रेना आड झुजांत युक्रेनांतली जनता, तांचे सैनीक आनी स्वताचे सैनीक धरून लाखांनी लोकांच्या मरणाक कारणीभूत थारिल्लो हुकुमशा व्लादीमीर पुतीन तशेंच इस्रायल आनी गाझापट्टींतल्या झुजांत बारा हजार लोकांच्या मरणाक कारणीभूत आशिल्ली आंतकी संघटना हमास मुखेली इस्माइल हानिये हे एकाधिकारशाह आनी इस्रायलाचे लोकशायेन वेंचून दिल्लो बेंजामिन नेतनयाहू हे आयच्या खिणाक आंतरराश्ट्रीय मळा वयले नरकासुर. जगांत हुकुमशायेंत, एकाधिकारशायेंत दिसताले ते नरकासुर आतां जगांतल्या अग्रणी लोकशायेंत दिसपाक लागल्यात. इस्रायलाक शस्त्रास्त्रां, अर्थीक मदत दिवपी अमेरिकेचो जो बायडेन आनी, गाझांत बायलां, भुरग्यांची कत्तल सुरू आसतना युद्धविरामाच्या विरोधांत मत दिवपी यू.के.चो प्रधानमंत्री ऋषी सुनक हे लोकशायेंचे प्रतिनिधित्व करतात खरें, पूण तांचीं धोरणां तांकां राकेसांचे पंगतींत व्हरून बसयतात. नागरिकां कडल्यान कराच्या रुपान एकठांय केल्ले अब्जावधी दुडू आपलो देश, समाजाच्या कल्याण, उदरगती खातीर वापरपाच्या जाग्यार हो राक्षसी राष्ट्राध्यक्षांचो चोंबो ती दुसऱ्या देशाच्या नागरिकांक मारून उडोवपा खातीर, तांचे संपत्तीचो नाश करपा खातीर वापरतना दिसता.
स्वताच्याच देशांत राजकी विरोधकांचे छळ करपी, तांकां मारून उडोवपी चीनचो शी जिनपींग आनी उत्तर कोरियाचो किम जाँग हेवूय नरकासुर. सत्ते खातीर धर्म, जात, पंथ हांचे मदी दुश्प्रचाराचें वीख कालोवन संघर्श, दंगे, जाळपोळ घडोवन लोकांची जीण सोंपोवन, संपत्तीची नासधूस करून हिंसाचारांतल्यान सत्ता हातासपी दंगेखोर खंयच्याय व्हडल्या पदार विराजमान आसले तरी तांची आनी तांचे क्रूर कार्यकर्ते हांची वृत्ती राक्षसी आसता.

जगांतल्या गिरेस्तांचे वळेरींत नांवां आशिल्ले कारखानदार, उद्देजक कामगारांची पिळवणूक करून उप्पाट दुडू कमोवन फायद्यांतले फकत दोन टक्के धर्मदायाक दितात तें आमी पळयलां. जागतीक गिरेस्तांच्या फोर्ब्स वळेरेंत नांवां नोंद आशिल्ले दान दिवच्या वेळार मात हात फाटीं घेतात. जगांतल्या मुखेल देशांत बंगले, संपत्त्यांचे मालक आनी जांची पत हजारो अब्ज रुपयांत आसा, तांचे लागीं वर्सुकीं दानांत रु. ५०० कोटी पसून दिवपाची दानत आसना. हांगा दानधर्मांत कवडी दिनासतना कर चुकवेपणान, बँकांक गंडो घालून हजारांनी कोटी दुडू हवाला मार्गान परदेशांत धाडून थंय वचून बशिल्ले फरारी उद्देजकांचीय व्हड वळेरी आसा. आपले खातीर काम करतल्यांक तांच्या श्रमाचो फावोसो मोबदलो दिनासतना तांची पिळवणूक करत आपल्यो तिजोऱ्यो भरपी, सरकारचें उत्पन्न बुडोवपी, बँकांचेर दरोडो घालपी भ्रश्टाचारी, आपसुवार्थी उद्देजकांची वृत्ती राक्षसी म्हणू येता.
जुगाराक जरी सरकारांनी कायदेशीर मान्यताय दिल्ली आसली आनी ऑनलायन, आॅफलायन रमी, जुगार चलोवप्यांक कितलीय समाजीक स्विकृती दिली तरीय लोकांक व्यसनी करून तांचे संवसार उध्वस्त करपी, तांकां रस्त्यार हाडपी तेवूय नरकासुरच म्हणचें पडटलें. मनीसजातीच्या विकासा खातीर नवे मार्ग तयार करपाक, आशिल्ले रुंदावपाक, रेल्वे लायन घालपाक, कारखाने बसोवपाक रानां, झाडां, मोनजाती, सुकणीं हांची जीण उध्वस्त करप्यांची, सैमाचो नाश करप्यांची आतां विकासपुरूश म्हणत तोखणाय जाता. शारीकरणाक लागून बांदकाम प्रकल्प वाडत आसा. ताका लागून प्रदुशण वाडपाक लागलां. मनशांक स्वास घेवप कुस्तार जालां. फाटल्या सप्तकांत राजधानी दिल्लीन जगांतलें सगळ्यांत चड प्रदुशीत शार जावपाचो मान मेळयलो. PM -2.5 श्रेणींतलो AQI – हवा गुणवत्ता निर्देशांक – 450 मायत आशिल्लो, जो मनशांचे भलायकेचे दृश्टीन धोकादायक श्रेणींत येता. जगांतल्या पयल्या धा चड प्रदुशीत शारांतलीं सात भारतांत आसात. प्रदुशणाक लागून जाल्ल्या श्वासाच्या दुयेंसान दर वर्सा 16 लाख लोक सोंपतात. तुळेन कोविडांत उणे सोंपिल्ले. तेन्ना सैम, मनीसजातीक मारक ठरपी सगळे विकासपुरूश हेवूय नरसंहारक नरकासुराचे श्रेणींत येतात.
महिलांचेर अत्याचार करपी म्हूण नरकासुर कुप्रसिद्ध आसाच. आयज महिला, चलयांचो लैंगीक छळ करपी, तांचेर बळजबरी करपी, तांकां देह वेपारांक प्रवृत्त करपी, तरणाट्याच्या कुडींक कीड लावपी ड्रग्स विकपी हे सगळे नरकासुराचेच सोयरे. सद्या गोंयांत तांची जमात वाडत आसा. महिला अत्याचार प्रकरणांत खास्त जाल्ले, बंदखणींत बंद आशिल्ले गुन्यांवकार आसाराम बापू आनी राम रहिम इन्सान हांचे सारकिले संताचें रुपडें घाल्ले नरकासुर. गुन्यांवकार नरकासुरांक धरपी तपास यंत्रणा पुलीस, ईडी, सीबीआयचे अधिकारी जेन्ना स्वता लांच प्रकरणांत सांपडटात तेन्ना तांचें चरित्र नरकासुरी जाल्लें आसता. सगळ्यांत शेवटा, समाजांत विखारी, घातक बातम्यो पातळावपी चॅनलांचे अँकर, वृत्त पत्रकार हे मिडियांतले नरकासुर. शब्द मर्यादेक लागून हो लेख म्हणल्यार ट्रेलर. आमी समाजांत वावुरतना पावला गणीक मनशाच्या भेसांतले नरकासुर सरभोंवतणी आसतात. तांच्या राक्षसी स्वभाव, वृत्तीचें दहन जावप आयच्या काळांत अशक्य.

दीपक लाड
पर्वरी