भांगरभूंय | प्रतिनिधी
‘लोस्ट हॉर्स’ दिग्दर्शक क्यूहवान जेओनपणजीः दक्षीण कोरिया, हंगेरी आनी पनामाच्या तीन आकर्शक चित्रपटांनी भारताच्या 55 व्या आंतरराष्ट्रीय चित्रपट महोत्सवांत सिनेमा मोगींक खोस दिली. सिनेमा ऑफ द वर्ल्ड विभागांत क्यूहवान जेओन हाचो दक्षिण कोरियन फिल्म ‘लॉस्ट हॉर्स’ आनी रॉड्रिगो क्विंटेरो अराउझ हाचो स्पॅनीश भाशेचो पनामाचो चित्रपट ‘द कॉल मी पॅन्झर’ हांचो आस्पाव आशिल्लो. बॅलिंट सिमलर हाणें दिग्दर्शीत केल्लो हंगेरीचो लेसन लर्नड हो चित्रपट आयसीएफटी-युनेस्को गांधी पदका खातीरय सर्त करता. ह्या सिनेमाच्या दिग्दर्शकांनी काल पत्रकार परिशदेंत वांटो घेतलो.
जेओन क्यू-ह्वानाच्या ह्या सिनेमांत किम ह्या जाण्ट्या मनशाचे संघर्श दाखयल्यात. जाचे 20 प्रीय घोडे जेजू जुंव्या वयल्या ताच्या चरोवपाच्या वाठारांतल्यान गूढ रितीन गायब जातात. बेकायदेशीर स्थलांतरीत लोक चोरिल्ल्या जनावरांक रानांत मारतात आनी मांस विकतात हें कळटकच किम ह्या वाठारांत धाड घालपा खातीर कारवाय करता.
आपल्या सिनेमाचेर भासाभास करतना जेओनान स्वतंत्र चित्रपट तयार करपाचीं आव्हानां उक्तायलीं आनी के-नाट्यांची संवसारीक लोकप्रियता आसून लेगीत अशा चित्रपटांक मान्यताय मेळपाक अडचणी येतात अशें सांगलें. कला चित्रपटांच्या गुंतागुंताचेर ताणें भर दिलो, पूण तांची निर्मिती सक्षम करपाचें श्रेय ओटीटी प्लॅटफॉर्मांक दिलें. ताणें म्हणलें, हांव भाग्यवान, म्हाका आदार दिवपी निर्माते आसात आनी इफ्फी सारक्या महोत्सवांनी म्हजीं फिल्मां दाखोवपाची संद मेळटा. ते म्हाका पॅन्झर म्हण्टांत.
दे कॉल मी पॅन्झर
पनामाचो चित्रपट निर्मातो रोड्रिगो क्विंटेरो अराउझ हाचो हो चित्रपट पनामाचो टेनेरिफचो फुटबॉल खेळगडो रोमेल फर्नांडीस गुतिएरेझ हाच्या जिवितांतल्यान प्रेरीत आसून तातूंत ताची आवड, जिद्द आनी खेळांचो परिवर्तनकारी शक्त धरल्या. रोमेलाक 1993 वर्सा फकत 27 वर्सां पिरायेचेर मोटार अपघातांत दुखेस्त मरण आयलें.
रोम्मेलाच्या कुटुंबीक जापसालदारक्यांचें समतोल दवरपाचेर ह्या सिनेमाचें लक्ष केंद्रीत केल्ल्याचेर रोड्रिगोन भर दिलो. पनामा सोडल्या उपरांत रोमेल पॅन्झर जालो अशें दिग्दर्शकान सांगलें. रोमेलाक वैयक्तीक रितीन वळखपी जायत्या जाणांनी ह्या सिनेमांत योगदान दिलें, तातूंत ताची भयण जॅकलीन हांचो आस्पाव जाता, तिणें ताच्या जिविताचे म्हत्वाचे खीण सांगले. रोड्रिगोन ह्या सिनेमाच्या वळणाचें वर्णन केलां की रोम्मेलान आपलें सपनां साध्य करपा खातीर कुटुंब सोडून वचपाचो निर्णय घेतला. ताणें म्हणलें, “हांव ताचो सारांश ‘सपन आनी कुटमाच्या मोगाचेर बरयल्लो चित्रपट’ अशें सांगूंक शकता.” पनामांतल्या फिल्म इंडस्ट्री विशीं उलयतना रोड्रिगोन सांगलें, आपल्या देशांत बरोच तेंप फिल्म दाखोवप कठीण. देखून लोकांक थंय सिनेमा पळोवपाची चड संद मेळना. 40 लाख लोकांची ल्हान लोकसंख्या आशिल्ल्या देशांत कठीणपणान शंबर फिल्म निर्माते आसात अशें तांणी सांगलें.
लेसन लर्नड
हंगेरीचो चित्रपट निर्मातो बॅलिंट सिमलर हाच्या ‘लेसन लर्नड’ ह्या पुस्तकांतल्यान समाजा मेरेन आरसो धरपी चित्रपट तयार करपाचो ताचो हेत दिसून येता. पोरन्या शाळेच्या पद्दतींक आव्हान दिवपी तरणाटो शिक्षक जुसी आनी हंगेरीच्या मागणी आशिल्ल्या शिक्षण वेवस्थेक अनुकूल जावपाक कश्ट करपी पालको ह्या नव्या शिक्षका फाटल्यान ही कथा घडटा. तांच्या वैयक्तीक कथांनी व्यापक हंगेरी समाजाचें प्रतिबिंबीत करपी जुलमी वेवस्थेची जाणविकाय मेळटा अशें बालिंटान स्पश्ट केलें.
पिरायेच्या णवव्या वर्सा अमेरिकेंतल्यान हंगेरींत रावपी बालिंट हाणें नव्या शिक्षण वेवस्थेक अनुकूल जावपाच्या वैयक्तीक अणभवांतल्यान प्रेरणा घेतली. शिक्षण वेवस्था दुप्पट जुलूम करपी आसा. एक समाज म्हणून आमकां खर नेमांची संवय जाल्या. ह्या प्रस्नांचेर फिल्मां वरवीं उजवाड घालपाची म्हाका गरज दिसली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
