भांगरभूंय | प्रतिनिधी
पणजी: कला आनी संस्कृती खात्या वतीन पांच सुवातां खातीर कंत्राटी भरती करतले. हातूंत संगीत प्रशिक्षक (गायन) पदा खातीर दोन, सांस्कृतीक आयोजकाची एक, साथ दिवपी गायकाची एक जाल्यार भरतनाट्यम साथ दिवपाच्या एका सुवातेचो आस्पाव आसा. हे खातीर 23 जुलय दिसा सकाळीं 10 ते दनपारां 1 वरां मजगतीं थेट मुलाखती जातल्यो.
संगीत प्रशिक्षक सुवाते खातीर म्हयन्याक 28 हजार 100 रुपया म्हयन्याक पगार आसतलो. हें पद णव म्हयन्यांच्या कंत्राटी तत्वाचेर भरतले. हे खातीर उमेदवारा कडेन संगीत पदवी वा गांधर्व म्हाविद्यालयांतल्यान विशारद पदवी वा कला अकादमींतलें समतुल्य शिक्षण आसप गरजेचें आसा. ताका तीन वर्सांचो शिकोवपाचो अणभव आसचो.
साथ दिवपी दोन पदां खातीर 26 हजार 700 रुपया म्हयन्याक पगार आसतलो. दोनूय पदां 9 म्हयन्यांच्या कंत्राटी तत्वाचेर भरतले. हे खातीर उमेदवारा कडेन गांधर्व म्हाविद्यालयांतल्यान मध्यमा पूर्ण वा कला अकादमींतले संगीत कुशल वा समतुल्य शिक्षण आसप गरजेचें आसा. तशेंच ताका तीन वर्सांचो अणभव आसप गरजेचो आसा.
सांस्कृतीक आयोजक पदा खातीर म्हयन्याक 28 हजार 100 रुपया पगार आसतलो. हें पद 10 म्हयन्याच्या कंत्रटाचेर भरतले. हे खातीर मान्यताय प्राप्त विद्यापिठाची पदवी, तशेंच कला आनी संस्कृतींतल्या खंयच्याय विभागाचें स म्हयन्याचें प्रमाणपत्र अभ्यासक्रम आसप गरजेचें आसा. सगल्या पदां खातीर कोंकणीचें ज्ञान आसप गरजेचें आसा. उमेदवाराची पिराय मर्यादा 45 वर्सां आसा. निवड जाल्ल्या उमेदवाराचीं नांवां कला आनी संस्कृती खात्याच्या अधिकृत संकेतथळार अपलोड करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
