भांगरभूंय | प्रतिनिधी
पणजीः कला अकादमी परत एक फावट वादांत घुस्पल्या. आयज सकाळीं कला अकादेमींतल्या व्हायोलीन वर्गाचें फॉल्स सिलिंग कोसळ्ळें आनी नव्यान नूतनीकरण केल्ले इमारतींतल्या कामाचो दर्जो परत एक फावट उक्ताडार आयलो, अशें राजकी वावुरपी सिसिल रोड्रिग्स हांणी सांगलें.
कोटी रुपयांचो खर्च करुन नूतनीकरण केले उपरांत लेगीत इतल्या थोड्याच काळांत इमारतीचे कांय भाग कोसळप हें निकृष्ट कामाचें आनी नेमाचें उल्लंघनाचें एक उदाहरण. हाचे आदीं हांवें हे संबंदी भ्रश्टाचाराची शिटकावणी दिली, जी आयचे घडणुकेन खरी थारल्या अशें तांणी पत्रकांत म्हणलां.
कला राखण मांड आनी नव्यान नेमिल्ल्या टास्क फोर्सान कामाच्या दर्ज्या विशीं जायत्यो कागाळी केल्ल्यो, पूण तांचे कडेन दुर्लक्ष जालें. कला अकादमीच्या नुतनीकरणाचेर सुरवाती सावन 60 कोटी परस चड भ्रश्टाचाराचो आरोप आसा. सरकारान सतर्कता चवकशी करपाचो आदेश दिल्लो. पूण हे चवकशेचो अहवाल अजून जाहीर जावंक ना.
हे घडणुकेची पुराय चवकशी करप सामकें गरजेचें आसा. जापसालदार अधिकाऱ्यांक आनी कंत्राटदारांक बेगोबेग जापसालदार धरचे अशी आमी मागणी करतात अशें सिसिल रोड्रिग्सान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
