भांगरभूंय | प्रतिनिधी
13 वांगड्यांचो आस्पाव, प्रसाद लोलयेंकार समन्वयक
भांगरभूंय । प्रतिनिधी
पणजीः विधानसभेच्या पावसाळी अधिवेशनांत दिल्ले हमी प्रमाण मुख्यमंत्री डॉ. प्रमोद सावंत हांणी कला अकादमीच्या नुतनीकरण कामाचो नियाळ घेवन सरकाराक सुचोवण्यो सादर करचे खातीर रंगकर्मी विजय केंकरे हांचे अध्यक्षते खाला 13 वांगड्यांच्या कृतिदळाची स्थापना केल्या. सरकार आनी कृतिदलांत समन्वय दवरचे खातीर शिक्षण सचीव प्रसाद लोलयेंकार हांची नेमणूक केल्या.
कला अकादमीच्या नुतनीकरणाचो वाद फाटल्या कितल्याश्याच वर्सांच्यान विधानसभा सभाघरांत तशेंच सभाघरा भायर गाजता. फाटल्या चार वर्सांत जाल्ल्या विधानसभा अधिवेशनांत विरोधी आमदारांनी कला अकादमीच्या नुतनीकरण कामांत कोट्यांनी रुपयांचो घोटाळो जाल्ल्याचो आरोप करून परतून परतून मुख्यमंत्री डॉ. प्रमोद सावंत आनी मंत्री तशेंच कला अकादमीचे अध्यक्ष गोविंद गावडे हांचेर टिका केल्या. जुलयांत जाल्ल्या पावसाळी अधिवेशनांत लेगीत विरोधी पक्ष फुडारी युरी आलेमांव, आमदार विजय सरदेसाय, व्हेन्झी व्हिएगश हांणी कला अकादमीच्या नुतनीकरणाच्या विशया वयल्यान परतून मुख्यमंत्री डॉ. सावंत आनी मंत्री गावडे हांकां लक्ष्य केल्ले. ते उपरांत हे संबंदांत कलाकारांचो आस्पाव आशिल्ले समितीची स्थापना करपाची हमी मुख्यमंत्र्यान दिल्ली. ते प्रमाण शुक्रारा 13 वांगड्यांच्या कृतिदळाची स्थापना करून सरकार आनी ह्या कृतिदळांत समन्वय दवरचे खातीर शिक्षण सचीव प्रसाद लोलयेंकार हांणी नेमणूक केली. मजगतीं, अधिवेश काळांत गोंयांतल्या कलाकारांनी कला राखण मंच ह्या बॅनरा खाला एकठांय येवन कला अकादमीच्या नुतनीकरणाचें काम बेगिनात बेगीन पुराय करून ती कलाकारांचे सुवादीन करपाची मागणी लावन धरिल्ली.
कृतिदळ समितीचे वांगडी
1 विजय केंकरे : अध्यक्ष
2. तोमाझीन कार्दोज : वांगडी
3. विल्यम फर्नांडीस : वांगडी
4. प्रवीण गांवकार : वांगडी
5. सतीश गांवस : वांगडी
6. देविदास आमोणकार : वांगडी
7. फ्रान्सीस कुएल्हो : वांगडी
8. चार्ल्स कुरैया फावंडेशनचो पदाधिकारी : वांगडी
9. सरकारचो मुख्य वास्तूविशारद तज्ञ : वांगडी
10. कला आनी संस्कृती खात्याचे संचालक : वांगडी
11. कला अकादमीचे वांगडी सचीव : वांगडी
12. मृणाल वाळके, मनरिजवण संस्था : वांगडी 13. संतोष म्हापणे, पीडब्ल्यूडीचे मुख्य अभियंते : वांगडी सचीव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
