भांगरभूंय | प्रतिनिधी
पणजी: कला अकादमी गोवा आनी इस्टीट्यूट मिनेझीस ब्रागांझा हांच्या जोड पालवान कला अकादमीच्या हिंदुस्थानी संगीत आनी नाच विभागा वतीन गुरुपौर्णिमे निमतान ता. 3 जुलयाक दनपरां 2.30 वरांचेर हिंदुस्थानी संगीत आनी नाच विभागांतल्या विद्यार्थाचो शास्त्रीय गायन वादन आनी नाचाची कार्यावळ जातली. तशेंच ता. 4 जुलयाक सकाळीं 10 वरां सावन कला अकादमीच्या पेडणें, सांखळे, वाळपय, सांगें, केपें आनी काणकोण ह्या संगीत केंद्रांतल्या विद्यार्थांचो संगीत मेळावो जातलो.
ता. 3 जुलयाक दनपरां 2.30 वरांचेर मानेस्तां हस्तुकीं परंपरीक रितीन दिवली पेटोवन कार्यावळ सुरू जातली. ही कार्यावळ इन्स्टीट्युट मिनेझीस ब्रागांझाच्या धाकट्या सभाघरांत जातली. शास्त्रीय सहगायनान कार्यावळ सुरू जातली. हातूंत रुपेश गांवस, सचीन तेली आनी सम्राज्ञी आईर हांचे शिश्य अवी परवार, मुक्ता मिसर, श्रुती नायक, उगम सावंत, सत्यनारायण कळंगूटकार आनी राजमी फळदेसाय ह्या विद्यार्थ्यांची ‘सुरन गावो सरस’ ही शास्त्रीय सहगायनाची कार्यावळ जातली. उपरांत नंदा कळंगूटकार हांचे शिश्य आरव सुर्लेकार हांचे पेटी वादन जातलें. उपरांत प्रेमानंद आमोणकार हांचे शिश्य आकाश नायक आनी यतीन कुंकळ्येंकार हांचें तबला सहवादन जातलें. उपरांत रोहीत वनकर हांची शिश्य रिया चोयिकदी हिचें बांसरी वादन जातलें.
बासरीवादना उपरांत सिमा शिकेरकार हांची शिश्य कथ्थक नाच सादर करतलीं. हातूंत वरदा चव्हाण, प्रेरणा प्रभू, अनुश्री प्रभू चांदलकार, प्रथा नायक आनी आरुषी प्रभु हीं आपल्या नाचांतल्यान शिवस्तुती आनी कृष्णभजन सादर करतलीं.
कार्यावळीची सांगता डॉ. सपना नायक ह्या शिश्यांच्या भरतनाट्यम नाचान जातली. हातूंत मराठी अभंगांच्या आधाराचेर सखा पांडुरंग ही कार्यावळ सादर करतले. हातूंत आकृती ताम्हणकार, गौरी शानबाग, अॅना मारिया के आनी अमिषा अडकोणकार ह्यो विद्यार्थीनी वांटो घेतलीं. हे कार्यावळी खातीर सुरज मोरजकार, भार्गवराम गर्दे आनी प्रज्योत ताम्हणकार हांची तबला साथ, तशेंच चारुदत्त गांवस आनी शुभम नायक हांची पेटी साथ मेळटली.
भरतनाट्यम नाचा खातीर डॉ. सपना नायक हांची नटवगम साथ आी तृप्ती दळवी ही गायन साथ दितली. मंदिरा तिरोडकार आनी वरदा बेडेकार हीं पुराय कार्यावळीचें निवेदन करतलीं.
दुसर्या दिसा ता. 4 जुलयाक सकाळीं 10 वरां सावन कला अकादमीच्या सगळ्या संगीत केंद्रांतल्या विद्यार्थ्यांची गायन-वादनाची कार्यावळ इन्स्टीट्युट मिनेझीस ब्रागांझाच्या धाकट्या सभाघरांत जातली. सगळ्या रसीक श्रोत्यांनी ह्या दोनूय दिसांचे संगीत कार्यावळींचो आस्वाद घेवचो. ही कार्यावळ सगळ्यां खातीर उक्ती आसा. सगळ्यांनी हे कार्यावळीक हाजीर रावपाचो उलो कला अकादमीच्या हिंदुस्थानी विभागा वतीन मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
