भांगरभूंय | प्रतिनिधी
संगीत शिक्षणाच्यो बऱ्यो सुविधा गोंयांत नात, हीं गायक शंकर महादेवन हांचीं उतरां आठ म्हयन्यां आदींचीं. तांणी कित्याक
अशें म्हळ्ळें? कला, नाच, संगीत, वाद्य, नाटक तशेंच हेर कलेच्या शिक्षणाचें केंद्र आशिल्ल्या गोंय कला अकादमींतलें वातावरण तांकां जंय तांची कार्यावळ जाल्ली थंय नाशिल्लें म्हणून?
गोंयचे भुंये कडेन नातें सांगपी, हे भांगरभूंयेंत जल्मल्ले गायक रेमो फर्नांडिस, हेमा सरदेसाय, शौनक अभिषेकी तशेंच नवे पिळगेंतले कलाकार कार्यावळीक नाशिल्ले म्हणून? गोंय कला अकादमी संकुल परतून केन्ना सुरु जातलें हाची जाप कला आनी संस्कृतीमंत्री गोविंद गावडे विधानसभेत दिवंक शकले ना ते कित्याक? कला अकादमीच्या एका कोनशा वेल्या ओपन एअर थिएटराचें पांखें मोडिल्ल्यान चालू आशिल्ले बांदावळीक व्हडा प्रमाणात आडमेळीं आयल्यांत? जाय ते प्रमाणात अर्थीक तजवीज जाल्ली ना? ह्या प्रस्नांच्यो जापो ताणीं दिल्यार गोंयच्या कला, संगीत, साहित्य, नाट्य, कलाप्रेमीं भितर आशिल्लो दुबाव पयस जावपाचो. जे कला अकादमींतल्यान हेमा, तीस वर्सां वयर अभिनयाच्या मळार आशिल्ली वर्षा उसगांवकार तशेंच हेर कलाकार घडले ते कला अकादमीचीं दारां चड तेंप बंद उरूंक जायना. कला अकादमींत परत ‘मोगरा फुलला’, ‘भारत आमचो देस म्हान’, ‘या या मयां या’, ‘आवारा भँवरे’ चे सूर बेगीन आयकूंक मेळचे म्हणून सरकारान येत्न करचे. कला अकादमीचो विंगड विंगड कला शिक्षणाचें उत्कृश्ठतायेचें केंद्र म्हणून पुनर्विकास करपाक गिन्यांनी कलाप्रेमींची बसका सरकारान घेवची.
कला अकादमी विशीं हो लेख बरयतना पयल्याच परिच्छेदांत लेखाचो हावेस स्पश्ट केला. ‘इमेजिन पणजी’ हे माळेंतल्यान ‘भांगरभूंय’ दिसाळ्यांत कला अकादमी प्रकल्पा विशीं बरयल्लें. आयज पणजेतल्या आत्माराम बोरकार मार्गार अर्थीक विकास महामंडळाची बिल्डिंग जंय आसा, थंय कला अकादमीची सुरवात जाल्ली, उपरांत मांडवी न्हंयेच्या वाठारांत कला अकादमी संकुलाची बांदावळ जाली. १९७० वर्सा जल्मल्ल्या कला अकादमीतलें कलेचें होमखण सांसणाचें जितें, जिवें उरपाक जाय. कला अकादमीची वास्तू समेस्तां खातीर मेळ्ळी ना म्हणून गोंयचे मातयेंतले कलेचें वैभव सोंपलें, अशें न्हय. मडगाव रवींद्र भवन, सांखळी, फोंडे, सांकवाळे, कुडचडेचीं कला भवनां, केंद्रां समेस्तांची, कलामोगींची गरज पुराय करतात. नव्यो अकादमी, स्टुडिओ, मंडळां खासगी मजतीन स्थापन करून गायक प्रविण गांवकार, पूर्णानंद च्यारी, प्रिन्स जेकब गोंयचे कलेक नव्यो माच्यो मेळोवन दिवपाक फुडें सरल्यात. गोंयचे पूत, धुवो ए आर रेहमान तशेंच हेर राष्ट्रीय पावंड्यावेले अकादमीत शिक्षण घेतात. फुडें फाटीं तांकां गोंयांत येवचें दिसलें जाल्यार माच्योय मेळटल्यो, पूण उमळशीक आसा मांडवीचे देगे वयले कला अकादमीची.
कला अकादमीचें मुळावण कला, नाच, गायनाचें अभ्यास केंद्र म्हणून ल्हानशे सुवातींत जाल्लें. माचीय ल्हान, सभाघरय ल्हान, पूण रसिकांचो उपाट प्रतिसाद मेळिल्ल्यान आदली मुख्यमंत्री शशिकला काकोडकार कला अकादमीच्या नव्या प्रकल्पा खातीर फुडें सरल्यो. कला अकादमीचेर चड मोग केलो तो कलामोगी मुख्यमंत्री प्रतापसिंह राणे हाणीं. कला अकादमीक संजीवनी दिवपाचो वावर मंद गतीन चालू आसा तें तांकां खबर आसतलेंच. तांणी फाटल्यान लागून आधुनिक विचारांतल्यान, गरजेंतल्यान कला अकादमीचो पुनर्जन्म जाल्यार तो खीण भांगराचो थारतलो. गोंयचे संघप्रदेश तेंपाचे मुखेलमंत्री स. दयानंद बाळकृष्ण बांदोडकार हांचें जल्मशताब्दी वर्सा कला अकादमीच्या संजीवनीची मोख सरकारान दवरची. सरकारान उलो मारल्यार कला अकादमी खातीर हजारांनी हात देणग्यो दिवपाक आसतलेच. मुठी मुठींचे तांकींतल्यान कला अकादमी उबारप, तिका उत्कृश्ठतायेचें केंद्र म्हणून अज्रंवर करप या ध्येयान काम केल्यार वर्सा भितर कला अकादमीची नवी वास्तु जातली.
पंडित कमलाकर नायक, अलकादेवी मारुलकार हाणीं वंदना बखले, समिक्षा भोबे काकोडकार, गौरी नायक भट, रुपेश गावस हांचेवरी गायक घडयल्लें गोंय संगीत विद्यालय कला अकादमींतल्यान व्हड जालें. अदुर गोपालकृष्णन, श्याम बेनेगल हांचेवरी दिग्दर्सक, निर्माते, साहित्यिकांनी, कलाकारांनी तोखणायिल्ली कला अकादमी आसा तेच सुवातींत उबारपा पासत नवें नियोजन करचें पडटलें हाची जाणवीकाय कलाकार आशिल्ले मंत्री गोविंद गावडे हांकां जाल्या. बेगोबेग पावलां मारल्यार उद्येगपती, कलाकारांच्या सुचोवण्यांतल्यान नवो प्रकल्प जन्माक कित्याक येवचो न्हय?
गोंय इफ्फीचें केंद्र जातना, ताचे उपरांत आदले मुखेलमंत्री मनोहर पर्रीकार, आमदार दिगंबर कामत मुखेलमंत्री आसतना कला अकादमीत सुदारणा जाल्ल्यो. श्री. कामत हाणीं मडगांव रवींद्र भवन केंद्रीय निधींतल्यान बांदून घेतिल्लें मागीर तांचेर कला अकादमीचे बांदावळीची जापसालदारकी कित्याक दिवची न्हय? कला अकादमी संकुलाकडेन नवे नदरेन, नव्यो गरजो पळोवन फकत सुदारणेचें वारें हाडलें म्हणून जावचें ना. कला अकादमीच्या फाटल्यान बांदिल्लो वाॅक वे, सरभोंवतणीच्या वातावरणांतले, स्मार्ट सिटींतले बदल पळेल्यार अकादमीच्या नव्या ताल्ल प्रकल्पाचो विचार सरकार करता अशें दिसता.
कलामोगींच्या सपनांतली कला अकादमी फुडारांत एकादरे रवींद्र कला अकादमीय जायत. गोवा कला अकादमी कडल्यान उर्बा घेवन महाराष्ट्र सरकारान अकादमी, रंगभवना बांदलीं. मागीर तांचे तशेंच हालींच मुंबय बांदिल्ल्या अंबानी कला, संस्कृती केंद्राची देख मुखार दवरून गोंय कला अकादमी जावपाक हरकत ना. उद्देगपती मुकेश अंबानी हांची भयण दिप्ती गोंयची सून. उद्देगपती दत्तराज साळगावकार हांची घरकान्न दिप्ती शिक्षणीक क्षेत्रांतल्या वावरांत आसा. कला अकादमीक निधी उणो पडचो ना. फकत सरकारान कलेच्या उत्कृश्ठताय शिक्षण केंद्राचो रोडमॅप म्हयन्या भितर करचो पडटलो. कला अकादमीत सद्या जो पांचवोताल्ल सैम जाला तो तिगोवपाची सोबीत संकुल बांदतना जतनाय घेवची.
मडगाव रवींद्र भवनाची वास्तुय कला अकादमीचे नवे बांदावळी वेळार नदरे मुखार आसची. भवनाची जापसालदारकी योग्य वेळार कलामोगी, सिने दिग्दर्शक राजेंद्र तालक हांचे कडेन दिल्या. इफ्फीच्या आयोजनांतल्या अणभवांतल्यान तांकां मडगाव रवींद्र भवनाचें अध्यक्षपद मेळ्ळां. ताका ते नवी दिका दितलेच, इफ्फी खातीर तेच वास्तुंत नवी यंत्रणा, नवें थळय निर्मणेची तांचे कडल्यान अपेक्षा दवरुया.
कला आनी संस्कृती संचालनालय, मिनेझिस ब्रागांझा सभाघर आशिल्ल्या बिल्डिंगेचें स्ट्रक्चरल आॅडिट बेगोबेग करचें. गोंयचे मातयेंतले कलेक नवे दीस कला, संस्कृती खात्याच्या येवजणींच्या बदलांतल्यान येत व्हय ?
सुहासिनी प्रभुगावकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
